Засгийн газраас “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” УИХ-ын тогтоолын төслийг 10-р сарын 30-ны өдөр өргөн мэдүүлсэн. Ерөнхий сайд Г.Занданшатар өнгөрсөн ням гарагт /2025.11.09/ танхимын гишүүдийн хамт Монгол Улсын ойрын таван жилийн хөгжлийн төлөвлөгөөг олон нийтэд танилцуулсан юм. Ерөнхий сайдын танилцуулгын дараа сайд нар сэтгүүлчдийн асуултад хариулав.

Төрд нүүрлэсэн авлига, хулгайг таслан зогсоохын тулд төрийн өмчит компаниудыг хувьчлах ёстой гэж олон жил ярьсан шийдвэр алхам хийхгүй байна. Засгийн газар ирэх таван жилд хулгайн үүд хаалгыг яаж хаах вэ? гэсэн асуултал ЗГХЭГ-ын дарга, Монгол Улсын сайд С.Бямбацогт хариулт өглөө. 



С.Бямбацогт, Төрийн өмчит компаниудыг цомхон чадварлаг болгох талаар Засгийн газар ажиллаж байна. Төрийг хувийн хэвшилтэй өрсөлдүүлэхгүй байх тал дээр анхаарч ажиллана. Төрийн өмчит команиудад нүүрлэсэн хулгайг таслан зогсоож, ил тод, нээлттэй болгох чиглэлээр ажиллаж байна. 2010-2025 оны хүртэлх хугацаанд “Эрдэнэс Тавантолгой” компанийн 586 гэрээнээс 581-ийг нь ил тод болгосон. Одоо олон улсын таван гэрээг ил тод болгохоор ажиллаж байна. 

Санхүүгийн гэрээ хэлэлцээр, тайлан, тендер нь ил тод болбол төрийн өмчит компаниудад нүүрлэсэн хулгай зогсоно. Үүнийг нэгдүгээрт авч хэрэгжүүлнэ.

Хоёрдугаарт, аль болох хувьчлах замаар олон нийтийн оролцоотой болгох талаар анхаарна. Төрийн болон орон нутгийн өмчийн компанийн тухай хуулийн төслийг УИХ-д өргөн мэдүүлсэн, хэлэлцэгдэж байна. Төрийн нийтийн өмчийн тухай хуулийн төслийг УИХ-д мөн өргөн барьсан. Энэ хоёр хууль батлагдвал Засгийн газар томоохон шинэчлэл хийх эрх зүйн боломж бүрдэнэ.



“Эрдэнэс Тавантолгой” компанид өнгөрсөн долоо хоногт олон улсын аудит оруулсан. Үүний гол зорилго нь энэ компанид олон улсын менежмент оруулах, цаашилбал олон нийтийн, ил тод хувьцаат компани болгох эхлэл юм.

Тиймээс УИХ-ын намрын чуулганд багтаж, МИАТ, Төрийн банк, ДЦС-3, төрийн өмчит цахилгаан түгээх компаниудын 10-51 хүртэлх хувийг хувьчлах бодлогын бичиг баримтыг УИХ-д өргөн барина гэв.