УИХ-ын намрын чуулган ирэх даваа гараг буюу 9-р сарын 15-нд эхэлмэгц Засгийн газраас өргөн мэдүүлсэн 2026 оны төсвийн тухай хуулийн төслийг хэлэлцэж эхэлнэ. Сангийн яамны Төрийн нарийн бичгийн дарга Ж.Ганбат тэргүүтэй тус яамны газрын дарга нар өнөөдөр ирэх оны төсвийн төслийг салбар салбараар нь тоймлон сэтгүүлчдэд мэдээлэл өглөө.  

Ахмадууд тэтгэврийн доод хэмжээг 1.5 сая төгрөг болгохыг шаардан жагсаж байна. Улсын төсөвт санхүүгийн ийм бодит боломж байгаа эсэхийг Сангийн яамны удирдлагуудаас тодруулсан юм.  

Сангийн яамны Төрийн нарийн бичгийн дарга Ж.Ганбат, Сангийн яам бодлогын яам биш. Энэ асуултад Гэр бүл, хөдөлмөр, нийгмийн хамгааллын Т.Аубакир сайд салбарын бодлого барьж буй сайдын хувьд хариулт өгөх ёстой.

Сангийн яамны хувьд төсвийн боломж талаас нь хариулахад, Нэг сая төгрөгөөс доош хэмжээний тэтгэвэр авч буй 400 мянган ахмад настан бий. Ахмадуудын тэтгэврийн доод хэмжээг 1.5 сая төгрөгт хүргэхэд 4.3 их наяд төгрөг шаардлагатай гэсэн тооцоолол гарсан.

Хэрэв ийм хэмжээний эх үүсвэр гаргая гэвэл өргөн бариад буй төсвөөсөө зардлуудыг хасах уу, эх үүсвэрийг нэмэх үү? гэдэг асуудал яригдана.

Эх үүсвэрийг нэмье гэвэл нийгмийн даатгалын шимтгэл 10 хувь байгааг 15 хувь болгох уу? Шимтгэл нэмэгдвэл эргээд ажил хөдөлмөр эрхэлж байгаа хүмүүсийн ачаалал нэмэгдэнэ.
 
Хэрэв шимтгэл нэмэхгүй гэвэл НӨАТ, ХХОАТ-ыг нэмж орлого бүрдүүлэх үү? гэдэг асуудал яригдана. Зардлаа хасъя гэвэл төрийн албан хаагчдыг 54 хувиар цомхтгож байж 4.3 их наяд төгрөгийн эх үүсвэр бүрдүүлнэ гэсэн үг. Эсвэл боловсролын салбарын зардлыг 100 хувь хасах хэмжээний том төсөв учир ойрын хугацаанд тэтгэврийн доод хэмжээг 1.5 сая төгрөгт хүргэх боломжгүй.  
Дээрх хувилбаруудаас аль зардлыг нь хасахыг хэлж мэдэхгүй. Энэ бол Засгийн газрын түвшинд яригдах асуудал гэж тайлбарлав.

Тэтгэврийг инфляцын түвшинд уялдуулан 6 хувиар нэмэхэд шаардагдах 378 тэрбум төгрөгийг 2026 оны төсвийн төсөлд суулгажээ. Өнөөдрийн байдлаар бүрэн тэтгэврийн доод хэмжээ 689 мянга, хувь тэнцүүлсэн тэтгэврийн доод хэмжээ 570 мянган төгрөг байна.