Японы эзэн хааны Монгол дахь албан ёсны айлчлалтай холбоотойгоор замын хөдөлгөөний түр зохицуулалт, хаалт иргэдийн бухимдлыг төрүүлж, цахим орчинд шүүмжлэл дагуулаад байсан. Зарим иргэд хаалттай замуудын улмаас олон цагаар хүлээж, мэдээлэл дутмаг байсныг онцолж байв.

Харин өнөөдөр буюу долоодугаар сарын 12-ны өдөр Эзэн Хаан Нарүхито Хүй долоон худагт очиж, Соёолон насны морьдын уралдааныг үзсэн.

Энэ үеэр иргэд зам хаах, түгжрэл үүсгэх вий гэж байсан ч цагдаагийн алба хаагчид зохион байгуулалттай ажиллаж чөлөөтэй зорчих боломжоор хангасан байна.

Энэ талаар иргэн “Японы эзэн хааны хамгаалалтын үеэр замын хөдөлгөөнд саад учруулалгүй шууд Хүй долоон худаг хүртэлх замыг чөлөөтэй нээж, Соёолонгийн морьд үзэх боломж олгосон цагдаагийнхандаа баярлалаа” хэмээн сэтгэгдлээ хуваалцжээ.