Энэ онд 60 жилийн ойгоо тэмдэглэж буй Баянзүрх дүүрэг тэмдэглэлт ойгоо тохиолдуулан иргэдэд хүртээмжтэй олон үйл ажиллагаа зохион байгуулж байна.  

Тухайлбал 20-р хорооны нутаг дэвсгэр дэх Дэндийн аманд 15 км орчим үргэлжлэх талбайн хогийг цэвэрлэлээ. Онгон дагшин байдлаа хадгалан үлдсэн Дэндийн ам нь Улаанбаатараас 50 орчим км зайтай.  
 
Дүүргээс энэ аманд монгол ахуй кластер төсөл хэрэгжүүлэхээр сонгожээ. “Бид монгол уламжлалт ёс заншил, байгаль дэлхийгээ хамгаалах, малчин иргэдийнхээ ёс заншлыг өвлүүлэн үлдээх үүднээс энэ төслийг хэрэгжүүлж эхэлсэн.  
 
Бурханы сүмээс зохион байгуулдаг, хог цэвэрлэх, цөлжилтөөс сэргийлэх, иргэдэд байгаль дэлхийгээ сүйтгэж байгаагийн сөрөг үр дагавар юу вэ гэдгийг танин мэдүүлэх нөлөөллийн  ажлууд манай төсөлтэй уялдаатай.Дэндийн аманд байгаль орчин цэвэрлэх ажлыг зохион байгуулсан  сайн дурынхан та бүхэндээ талархаж байна” хэмээн БЗД-ийн ИТХ-ын Ажлын албаны дарга А. Уранбилэг ярилаа. 

Энэ сарын 22-ны ням гарагт шар хантааз өмссөн 250 гаруй сайн дурынхан өөрсдийн унаагаараа Дэндийн аманд ирж, гол дагуух 15 км газрыг самнан хаягдал дугуй, шил, лааз, малын сэг зэм, ундааны сав, голын усанд хаясан хуванцар хаягдал, гялгар уут зэрэг 350 гаруй шуудай хог түүжээ. 

Тэд 3.5  тонн ахуйн хог хаягдлыг  өөрсдийн унаагаар зөөсөн байна. Ахлах ангийн сурагчид, оюутан, залуус гээд итгэгчид, сайн дурынхан оролцсон байна.