ОХУ-ын Ерөнхийлөгч Владимир Путин тус улсын түлш, эрчим хүчний салбарын экспорт болон газрын тос боловсруулах үйл ажиллагаатай холбоотой зарим мэдээллийг нийтэд түгээхийг хязгаарласан зарлигт есдүгээр сарын 28-нд гарын үсэг зуржээ.

Уг зарлигаар эрчим хүчний экспортын талаарх мэдээллийг хэвлэл мэдээллийн хэрэгсэл болон интернэтээр нийтэд түгээхийг хязгаарласан байна. Үүнд экспортод гаргаж буй бүтээгдэхүүний нэр төрөл, хэмжээ, үнэ, худалдагч, худалдан авагч, мөн тээвэрлэгч, зуучлагч, даатгагчийн мэдээлэл багтжээ.

Мөн экспортын чиглэл, тээвэрлэлтийн маршрут, ачилт болон дамжуулан ачих цэг, далайн терминал, агуулахын байршил, тээвэрт ашиглаж буй хэрэгсэл болон гаалийн баримттай холбоотой мэдээллийг хязгаарласан байна. Түүнчлэн экспортын талаарх нэгтгэсэн гаалийн статистикт мөн уг зохицуулалт хамаарна.

Reuters-ийн мэдээлснээр, уг арга хэмжээ нь АНУ болон барууны орнуудын тавьсан хориг арга хэмжээг хэрэгжүүлэхэд хүндрэл учруулах зорилготой байна. ОХУ өмнө нь ч газрын тосны үйлдвэрлэл зэрэг эрчим хүчний салбарын зарим мэдээллийг нийтэд мэдээлэхийг хязгаарлаж байсан бөгөөд шинэ зарлиг нь экспортын талаарх мэдээллийн хүрээг илүү өргөжүүлж байгаа юм.

Гэхдээ энэ нь мэдээллийг төрийн байгууллага болон холбогдох талууд огт ашиглахгүй гэсэн үг биш юм. Зарлигаар хязгаарласан мэдээллийг эрх бүхий байгууллагад хуульд заасан журмын дагуу өгөх боломжтой бөгөөд тухайн компани өөрийн үйл ажиллагааны талаар мэдээллээ өөрөө ил болгосон тохиолдолд нийтлэхийг зөвшөөрчээ.

ОХУ-ын Засгийн газар уг зарлигт хамаарах бүтээгдэхүүний төрлийг 10 хоногийн дотор тодорхойлох үүрэг хүлээсэн байна. Зарлиг нь гарын үсэг зурсан өдрөөсөө хүчин төгөлдөр мөрдөгдөж эхэлжээ.

Эх сурвалж: Reuters