УИХ-ын 30 гишүүний боловсруулсан Төсвийн тухай хуульд нэмэлт, өөрчлөлт оруулах тухай хуулийн төслийг өнөөдөр (2026.09.29) УИХ-ын дэд дарга Ж.Бат-Эрдэнэд өргөн мэдүүллээ.

Энэхүү хуулийн төсөлд төсвийн хөрөнгө оруулалтыг шалгуур, оноонд үндэслэн эрэмбэлэх, төсвийн мэдээллийг ил тод болгох, иргэдийн оролцоог нэмэгдүүлэх зохицуулалт тусгажээ. Тухайлбал, урьдчилан үнэлж, эрэмбэлээгүй төсөл, арга хэмжээг улсын төсөвт тусгахыг хязгаарлах, хөрөнгө оруулалтын төсөл болон санхүүжилтийн мэдээллийг цахимаар нээлттэй нийтлэхээр тусгасан байна. Мөн төсвийн урсгал зардлыг байгууллага бүрээр нь зардлын төрөл, зориулалт, нэгж өртөг, тоо хэмжээ, өмнөх оны гүйцэтгэлтэй харьцуулсан байдлаар дэлгэрэнгүй танилцуулах шаардлага тавьжээ.

Түүнчлэн төсвийн төслийг иргэдэд ойлгомжтой хэлбэрээр танилцуулж, олон нийтийн саналд хэрхэн хариу өгсөн талаар тайлагнах зохицуулалт оруулахаар тусгасан байна. Хуулийн төсөл санаачлагчид одоо мөрдөж буй зохицуулалтын хэрэгжилт хангалтгүй, төсвийн төлөвлөлтийн сахилга сул, урсгал зардлын мэдээлэл хангалттай ил тод бус байгааг өөрчлөлт хийх үндэслэл болгожээ.

Төслийг боловсруулахдаа олон улсын туршлага, судалгаа, шинжилгээнд тулгуурласан бөгөөд төсвийн төсөл, тодотгол, гүйцэтгэлийн тайланг энгийн ойлгомжтой хэлбэрээр нийтлэх, иргэдийн санал хэрхэн шийдвэрлэгдсэнийг мэдээлэх тогтолцоог бүрдүүлэхээр тусгасан байна.

Эх сурвалж: Улсын Их Хурлын Нээлттэй парламентын газар