“Залилангийн хохирогч болсон бол бидэнтэй холбогдож, мөнгөө эргүүлэн аваарай” гэх мэдээлэл түгээж буй “Монголын луйврын мэдээллийн төв” нэртэй Фэйсбүүк пэйж нь албан ёсны байгууллага биш болохыг Монголын баримт шалгах төв мэдээллээ.

Тус пэйж нь нээгдээд удаагүй, цөөн дагагчтай бөгөөд бусдын зураг, постерыг ашигласан, холбоо барих утас, хаяггүй зэрэг сэжигтэй шинж тэмдэгтэй байжээ. Мөн пэйжийн лого нь хиймэл оюунаар үүсгэсэн шинжтэй болохыг Монголын баримт шалгах төв тогтоосон байна.

Тухайлбал, “Монголын луйврын мэдээллийн төв” нэртэй пэйж 2026 оны есдүгээр сарын 16-нд иргэдийн залилуулсан мөнгийг буцаан авч өгнө гэх агуулгатай пост нийтэлсэн бөгөөд уг пост 107 реакц, 84 сэтгэгдэл авч, 21 удаа цааш түгээгдсэн байна.

Мөн тус пэйж зураг ашигласан байдлаар шалгахад Цагдаагийн ерөнхий газрын Урьдчилан сэргийлэх хэлтсийн постеруудыг удаа дараа хуулбарлан нийтэлсэн нь илэрчээ.

Монголын баримт шалгах төвийн дүгнэснээр, уг пэйж иргэдийн залиланд алдсан мөнгийг олж өгнө гэх нэрийдлээр хувийн мэдээллийг нь авч, дахин залилан үйлдэх эрсдэлтэй байна.

Монгол Улсад залилан, хулгайн гэмт хэргийг мөрдөн шалгах мэргэжлийн байгууллага нь Цагдаагийн ерөнхий газар юм. Иймд баталгаагүй хаягт хандахгүй байж, залилангийн талаар 102 дугаарт хандахыг Монголын баримт шалгах төвөөс зөвлөж байна. 
Эх сурвалж: Монголын баримт шалгах төв