“Тэрбум мод” хөдөлгөөн хэрэгжиж эхэлснээс хойш улсын хэмжээнд нийт 140.4 сая орчим мод тарьж, ургуулсан байна. Үүний үр дүнд Монгол Улсын ойрхог чанар 7.9 хувиас 8.71 хувь болж өссөн талаар Экологийн цагдаагийн албанаас мэдээллээ.

Үүнээс Сэлэнгэ аймаг 26.2 сая мод тарьж, хамгийн өндөр үзүүлэлттэй байна. Тус аймаг 20 сая мод тарих амлалтаа давуулан биелүүлж, гүйцэтгэл нь 131.2 хувь болжээ. Харин Хэнтий аймаг 6.37 сая, Төв аймаг 6.27 сая мод тарьсан үзүүлэлттэйгээр удаалж байна. Мөн Сэлэнгэ аймаг тарьц, суулгацын нөөцөөрөө тэргүүлж, 30.37 сая ширхэг нөөц бүрдүүлжээ.

Сүүлийн 80 гаруй жилийн хугацаанд дэлхийн дундаж температур 1.1-1.2 хэмээр нэмэгдсэн бол Монгол орны жилийн дундаж температур 2.25-2.46 хэмээр өсжээ. Үүний зэрэгцээ ургамал ургах нэн чухал үе болох дулааны улирлын хур тунадасны хэмжээ 7-8 хувиар буурсан байна. Энэ нь Монгол орон дэлхийн дунджаас хэд дахин хурдан дулаарч, хуурайшилт нэмэгдэж байгааг харуулж байна хэмээн Экологийн цагдаагийн албанаас мэдээллээ.

Иймд “Тэрбум мод” хөдөлгөөний хүрээнд 2030 он гэхэд нэг тэрбум мод тарьж, ургуулан, ойрхог чанарыг 9 хувьд хүргэх зорилт тавьжээ. Одоогийн байдлаар уг зорилтын 14 орчим хувийг хэрэгжүүлээд байна. Цаашид мод тарилтыг нэмэгдүүлэхээр улсын хэмжээнд 455 мод үржүүлгийн газар ажиллаж, нийт 163.9 сая ширхэг тарьц, суулгацын нөөц бүрдүүлээд байгаа аж.