Ойрын өдрүүдэд гадаадын иргэд Монголд аргаль угалз агнасан гэх зураг, бичлэгүүд олон нийтийн сүлжээнд тарж, иргэдийн анхаарлыг татаж байна.

Тэгвэл Засгийн газар жил бүр Монгол Улсад тусгай зориулалтаар агнах агнуурын амьтдын тоо хэмжээг тогтоодог. 2026 онд угалз, тэхийн агнуурын квотыг жилийн явцад нэмэгдүүлжээ.

Тодруулбал Засгийн газрын 2026 оны тавдугаар сарын 13-ны өдрийн 195 дугаар тогтоолоор олзворын ангийн зориулалтаар 85 угалз, 132 тэх, 83 халиун буга агнуулахаар анх тогтоожээ.

Харин долоодугаар сарын 29-ний өдөр Засгийн газрын 321 дүгээр тогтоолоор уг квотод өөрчлөлт оруулсан байна.

Ингэхдээ:

- Угалз – 85-аас 103 болж, 18-аар 
- Тэх – 132-оос 159 болж, 27-оор нэмэгдсэн байна.

Нэг угалз хэдэн төгрөгийн үнэлгээтэй вэ?

Засгийн газрын 2017 оны 339 дүгээр тогтоолоор Алтайн угалзын олзворын жишиг үнийг 24,000 ам.доллар, Говийн угалзынх 14,000 ам.доллар, Алтайн тэхийнх 3,000 ам.доллар, Говийн тэхийнх 2,600 ам.доллар, халиун бугынх 1,600 ам.доллар байхаар тогтоожээ. 

Харин олон улсын агнуурын зах зээл дээр нэг угалз агнах аяллын үнэ үүнээс хавьгүй өндөр байна. Тухайлбал 2026 оны агнуурын улирлын мэдээллээр нэг аяллын багцад Алтайн угалз $145,000–$195,000, Хангайн угалз $105,000–$155,000, Говийн угалз $85,000–$135,000 орчим гэж санал болгосон жишээ байна.

Тусгай зориулалтаар агнасан амьтны нөөц ашигласны төлбөр, зөвшөөрлийн хураамжийг орон нутгийн төсөвт төвлөрүүлдэг. Ан амьтны нөөц ашигласны төлбөрийн орлогын 50-иас доошгүй хувийг байгаль орчныг хамгаалах, байгалийн нөөцийг нөхөн сэргээх арга хэмжээнд зарцуулахаар хуульд заажээ.