УИХ-ын өнгөрсөн хаврын чуулганаар Олон хүүхэд төрүүлж өсгөсөн эхийг урамшуулах тухай хуульд нэмэлт өөрчлөлт оруулсан. Энэ хуульд “...дөрөв болон түүнээс дээш хүүхэд төрүүлж өсгөсөн, бага хүүхэд нь 1 нас хүрсэн...” эхэд Эхийн алдар одон олгоно гэсэн зохицуулалттай байсан бол 2026 оны 5-р сарын 29-ний өдөр батлагдсан хуулиар уг өөрчлөлтийг хассан.

Өөрөөр хэлбэл, хүүхэд төрүүлсэн л бол ой хүрэлгүй эндсэн ч хүүхдээ төрүүлсэн гэж үзэж, “Эхийн алдар” одонг олгохоор хуульчилсан бөгөөд энэ хууль 2027 оны 1-р сарын 1-нээс хэрэгжиж эхэлнэ.
Хуульд:

• Зургаан хүүхэд төрүүлсэн эхэд- “Эхийн алдар” I зэргийн одон
• Дөрвөн хүүхэд төрүүлсэн эхэд – “Эхийн алдар” II зэргийн одон олгохоор тусгасан.

I зэргийн одонтой эхэд жилд нэг удаа 400 мянга, II зэргийн одонтой эхэд 200 мянган төгрөгийн тусламж олгодог. Энэхүү мөнгөн тусламжийг олгоход зориулж 2027 оны Улсын төсөвт 9.5 тэрбум төгрөгийг 37.5 мянган эхэд олгохоор тусгажээ.