Говийн байгаль, сумын хөгжил “Ханбогд марафон 2026” Өмнөговь аймгийн Ханбогд суманд говийн байгаль, сумын хөгжил, Дэмчогийн хийдийн үзэсгэлэнг тольдох олон нийтийн марафон болох гэж байна.

Ирэх аравдугаар сарын 10-нд болох “Ханбогд марафон 2026” нь 5, 10, 21 км зайн ангилалтай бөгөөд нийт 55,6 сая төгрөгийн шагналын сантай юм. Уг марафоныг Өмнөговь аймгийн Ханбогд сумын Засаг даргын Тамгын газар, Рио Тинто Монгол, Оюу Толгой, Ханбогд хөгжлийн хурдасгуур Оюу Толгойн сангийн дэмжлэгтэйгээр Элит гүйлтийн клуб зохион байгуулж байна. 

Ханбогд хөгжлийн хурдасгуур Оюу Толгойн сан тус сумын дэд бүтцийн хөгжилд хөрөнгө оруулж, сүүлийн жилүүдэд спорт цогцолбор, цэцэрлэгт хүрээлэн зэрэг дэд бүтцийн бүтээн байгуулалтуудыг ашиглалтад оруулсан. Мөн Ханбогд сумын төв нь нийт 25 км хатуу хучилттай авто замтай. Үүгээрээ улсын хэмжээнд хамгийн урт авто замтай сум болоод буй.

Марафоны 5, 10 км-ийн гүйлт эдгээр зам дээр явж, сумын төвийн гол гудамж, олон нийтийн байгууламжуудаар дамжин өнгөрөх бөгөөд Галбын цэцэрлэгт хүрээлэнд очсоноор барианд хүрнэ. Харин 21 км буюу хагас марафоны гүйгчид Дэмчогийн хийдийн авто замаар гүйх юм.

Оролцогчдын аюулгүй байдлыг хангах хүрээнд гүйлтийн зам дагуу усны зогсоол, анхны тусламжийн цэгүүдийг ажиллуулна. Түүнчлэн марафоны үеэр соёл, урлагийн тоглолт, бүх насныханд зориулсан гэр бүлийн үйл ажиллагааг зохион байгуулах аж.