Хөрөнгө оруулалтын тухай хуулийн нэмэлт, өөрчлөлт, хөрөнгө оруулагчдын эрх ашгийг хамгаалах чиглэлээр мэдээлэл хийж байна.

Шадар сайдын зөвлөх Г.Жавхлантөгс:

- Хөрөнгө оруулалтын тухай хууль, зөвшөөрлийн тухай хууль болон дагах 89 хуульд өөрчлөлт орсноор бодлогын хувьд томоохон шинэчлэлт болж байна. Эдийн засгийн эрх чөлөөний хуульд гол зарчмын асуудлуудыг тусгаж өгсөн. Тухайлбал, Засгийн газар бизнес эрхлэхгүй, бизнесийн үйл ажиллагааг бүхий л боломжоор дэмжих, хүнд суртлыг хязгаарлах гэх мэт олон зармыг зааж өгсөн байна.

Дагалдах 20 орчим хуульд томоохон өөрчлөлт хийсэн. Тодруулбал хөрөнгө оруулалтын тухай хуулийн 11.2 заалтад сэргээгдэх эрчим хүч, дата төв зэрэг салбаруудад хөрөнгө оруулбал тоног төхөөрөмжийг гаалийн албан татвараас чөлөөлнө гэж заасан. Өнгөрсөн хугацаанд энэ заалт ерөөсөө хэрэгждэггүй байсанд одоо хэрэгжиж эхэллээ. Эрчим хүч, дата төв гэх салбараас гадна барилга байгууламж, инновац, технологийн салбарууд ч багтаж байна.

Хөрөнгө оруулалтын хуулиар хөрөнгө оруулалтын хэлбэрийг өргөжүүлсэн. Мөн хөрөнгө оруулалтын гомдол шийдвэрлэх тогтолцоор бүрдүүлэх, маргааныг олон улсын Арбитраар шийдвэрлүүлэх боломж нээгдлээ.  Хөрөнгө оруулалт, худалдааны агентлаг цаашдаа богино хугацаанд 30 хоногийн дотор хөрөнгө оруулагчдын санал гомдлыг шийдвэрлэнэ.

Хөрөнгө оруулагчид үзүүлэх татварын урамшууллын тухай өөрчлөлтүүд мөн орсон. Монгол улсын арилжааны банк болон бусад бүх хөрөнгө оруулалтын сан, ББСБ-ууд гадаад, дотоодын эх үүсвэрээс татсан зээл, өрийн хэрэгслийн хүүгийн орлогод 5 хувийн татвар оногдуулахаар болсон. 

Хөрөнгө оруулалт, худалдааны газрын дарга Б.Зандан:  

- Хөрөнгө оруулалт, худалдааны газар 2023 онд байгуулагдсан. Энэ жилийн энэ жилийн 7 сард манай чиг үүрэг хуульд заагдаж орж ирсэн. Бид хөрөнгө оруулагчдыг татах, дэмжих, хамгаалах, асуудлыг шийдвэрлэх, мэдээлэл гаргах, хүргэх зэрэг үйл ажиллагааны чиглэлтэй болсон.

Чиг үүргийн хүрээнд хөрөнгө оруулагчдын гомдол санал хүсэлт амаргүй ажил. Бид энэ чиглэлээр идэвхтэй ажиллахаар төлөвлөөд байна. Төрийн байгууллага болон албан тушаалтны хууль бус үйлдэл болон эс үйлдэхтэй холбоотой асуудал үүсвэл хөрөнгө оруулагчид маань манай агентлагт хандах боломжтой. Тухайн гомдлыг бид 30 хоногийн хугацаанд шийдвэрлэх үүрэг хүлээж байна

Хөрөнгө оруулалтыг нэмэгдүүлэхээр таван чиглэл гарган өчигдөр Засгийн газраар батлуулсан. Энэ төлөвлөгөөнд хөрөнгө оруулалтын таатай эрх зүйн орчныг бүрдүүлэх, гадаадын хөрөнгө оруулалт татах тогтолцоог хөгжүүлэх, Институтийн чадавх болон хүний нөөцийг бэхжүүлэх, гадаадын хөрөнгө оруулагчдыг гомдлыг шийдвэрлэх, хөрөнгө оруулагчдыг хамгаалах тогтолцоог бүрдүүлэх гэх чиглэлүүд тусгагдсан.

Хөрөнгө оруулагч нарт зориулж цахим экосистемийг бүрдүүлэхээр төлөвлөгөөнд тусгагдсан. Төрийн байгууллагын албан хаагч нарын чадварыг ахиулах сургалт орох зэрэг ажлыг мөн төлөвлөгөөнд оруулсан. Манай агентлагийн газарт нэг цэгийн үйлчилгээ бий. Үүнд УБЕГ, ГИХГ, НДЕГ-аас хүмүүс сууж үйлчилгээ үзүүлдэг. Цаашид илүү хөгжингүй болгохоор зорьж байна.

Хөрөнгө оруулалтын тухай хууль маань хөрөнгө оруулагчдыг дотоод болон гадаадын гэж ялгахгүй. Иймд дотоодын хөрөнгө оруулагчид ч биднээс үйлчилгээ авч, эрх ашгаа хамгаалуулах эрхтэй.