Өнөөдрийн Засгийн газрын ээлжит хуралдаанаас гарсан зарим шийдвэрийг танилцуулж байна. 

Байгаль орчны сайд Ц.Сандаг-Очир:
Сүүлийн үед хүрэн баавгай суурьшлын бүс рүү ойртох тохиолдол эрс нэмэгдэж байна. Монгол орны 12 аймагт сүүлийн хоёр сард баавгай орж ирсэн 240 гаруй тохиолдол бүртгэгдээд байна. Хоёр хоногийн өмнө Улаанбаатарт орж ирсэн дуудлага бүртгэгдсэн. Энэ бол уур амьсгалын өөрчлөлт, ган гачиг, идэш тэжээл буурсантай холбоотой. 1980-аад оноос хойш бид хүрэн баавгайгаа тоолоогүй байна. Тиймээс ойрын хугацаанд тоолно. Хангайн уул хаданд алхдаг ард иргэд сонор сэрэмжтэй байх, хөдөө орон нутагт ургац хураалт, самар жимс түүж, ан гөрөө хийж байгаа иргэд сэрэмжээ нэмэх шаардлагатай байгааг анхааруулъя. 

Улсын байцаагч нар маань "улаан" гараараа буюу мотоциклтой нь унаад, тээврийн хэрэгсэлгүй нь явганаар хүрч очин олс дээсээр бугуйлдаж баавгайтай тэмцэж байна. Багаж, зориулалтын хэрэгсэл байдаггүй. Орон нутагт авран хамгаалах, зэрлэг амьтдыг барих зориулалтын хэрэгсэл байхгүй тул эхний ээлжид унтуулдаг буу, үргээх цацлага авахаар богино хугацаанд гаднаас импортолно. Нөгөө талдаа төсөв дутуу байгаагаас байцаагч, байгаль хамгаалагчид шатахуунаа өөрсдийн зардлаас гаргадаг. Тиймээс дээрх асуудлыг ЗГ-т танилцуулж улсын нөөцөөс 1.88 тэрбум төгрөгийг гаргуулахаар шийдвэрлэлээ. 

Мөн тусгай хамгаалалттай газруудад баавгайг амьдаар нь барих тор хийлгэх, амь тулсан нөхцөлд амиа аврах үүднээс баавгайг буудах чиглэлийг өгсөн. Дархан-Уул аймагт гэхэд гурван баавгай устгах квот өгсөн. Цаашдаа ангын зөвшөөрөл олгох асуудлыг мөн хөндсөн ба хууль эрх зүйн орчныг эргэн харахыг үгүйсгэхгүй.