Хөрөнгө оруулалтын орчны хууль эрх зүйн шинэчлэл болон хөрөнгө оруулагчдын эрх ашгийг хамгаалах чиглэлээр "Хөрөнгө оруулагчдын эрх ашгийг хамгаалах, хууль эрх зүйн шинэчлэлийг танилцуулах өдөрлөг, зөвлөлдөх уулзалт" энэ сарын 24-нд болно.

Арга хэмжээ есдүгээр сарын 24-ний Пүрэв гарагт 09:00-12:00 цагийн хооронд Хөрөнгө оруулагчдын эрх ашгийг хамгаалах төвд буюу Засгийн газрын XI байр, Эдийн засаг, хөгжлийн яамны нэгдүгээр давхарт зохион байгуулагдах гэж байна.

Өдөрлөгт Монгол Улсын Шадар сайд Т.Доржханд, Эдийн засаг, хөгжлийн дэд сайд С.Даваасүрэн, Хөрөнгө оруулалт, худалдааны газрын дарга Б.Зандан, Шадар сайдын зөвлөх Г.Жавхлантөгс нар оролцож, Эдийн засгийн эрх чөлөөний тухай хууль болон Хөрөнгө оруулалтын тухай хуульд оруулсан нэмэлт, өөрчлөлт, тэдгээрийн хэрэгжилт, хөрөнгө оруулагчдын эрх ашгийг хамгаалах асуудлаар мэдээлэл хүргэж, санал солилцоно.

Мөн эдгээр хуулийн хэрэгжилт, хөрөнгө оруулагчдын эрх ашгийг хамгаалах тогтолцоог бэхжүүлэх асуудлаар төр, хувийн хэвшлийн төлөөлөлтэй санал солилцох юм.

Тус уулзалт англи хэлээр явагдах бөгөөд хөрөнгө оруулалтын орчны шинэчлэлийн талаарх мэдээллийг олон нийтэд хүргэх зорилготой аж.

Хэзээ: 2026 оны 9 дүгээр сарын 24, Пүрэв гараг
Цаг: 09:00-12:00
Хаана: Хөрөнгө оруулагчдын эрх ашгийг хамгаалах төв, Засгийн газрын XI байр, ЭЗХЯ-ны 1 давхар
Хэл: Англи