Эмээлт эко аж үйлдвэрийн паркийн 24 МВт-ын дулааны цахилгаан станц, цэвэрлэх байгууламжийн бүтээн байгуулалтын шавыг өнөөдөр тавилаа. Эдгээр байгууламж нь Эмээлт эко аж үйлдвэрийн паркийн үйлдвэрүүдийг эрчим хүч, дулаанаар хангах, үйлдвэрлэлийн бохир усыг технологийн дагуу цэвэршүүлэх үндсэн дэд бүтцийн нэг хэсэг юм.

Эмээлт эко аж үйлдвэрийн парк нь малын гаралтай түүхий эдийг дотооддоо боловсруулж, нэмүү өртөг шингэсэн бүтээгдэхүүн үйлдвэрлэн экспортод гаргах зорилготой. Парк бүрэн хөгжсөнөөр 5600 гаруй тогтвортой ажлын байр бий болж, нийт 1.7 их наяд төгрөгийн орлого бүрдүүлэх, жилд 86.3 тэрбум төгрөгийн татварын орлого төвлөрүүлэх боломжтой гэж тооцоолжээ.

Тус паркт жилд 7.5 сая ширхэг арьс шир, 3000 тонн ноос, 5800 тонн ноолуур, 25 мянган тонн мах, 8000 тонн дайвар түүхий эд боловсруулах хүчин чадал бүхий үйлдвэрлэл хөгжүүлэхээр төлөвлөсөн байна. Хөрөнгө оруулалтаа 6.7 жилийн хугацаанд нөхөх тооцоо гаргажээ.

Харин өнөөдөр шавыг нь тавьсан цахилгаан станц ашиглалтад орсноор паркийн үйлдвэрлэлийн эрчим хүч, дулааны хэрэгцээг найдвартай хангах нөхцөл бүрдэх юм. Цэвэрлэх байгууламж ашиглалтад орсноор үйлдвэрлэлийн бохир усыг цэвэршүүлж, байгаль орчинд үзүүлэх сөрөг нөлөөллийг бууруулах боломжтой болно.

Эмээлтэд Харгиа орчмын арьс шир, ноос боловсруулах үйлдвэрүүдийг үе шаттайгаар төвлөрүүлнэ. 

Мөн Харгиа орчимд үйл ажиллагаа явуулж буй арьс шир, ноос боловсруулах үйлдвэрүүдийг үе шаттайгаар Эмээлтэд төвлөрүүлэхээр төлөвлөж байна. Ингэснээр Хан-Уул дүүргийн 19, 20 дугаар хорооны иргэдийн амьдрах орчныг сайжруулах, үйлдвэрийн бүсийн бохирдлыг бууруулах нөхцөл бүрдэхээр байна.

Эмээлт эко аж үйлдвэрийн паркийг хөгжүүлснээр үйлдвэрлэлийн төвлөрлийг хотын төвөөс шилжүүлэхийн зэрэгцээ Улаанбаатарын замын хөдөлгөөн, тээврийн ачааллыг бууруулах, хотын хэт төвлөрлийг сааруулахад тодорхой хувь нэмэр оруулах боломжтой гэж үзэж байна.

Нийслэлийн зүгээс паркийн шаардлагатай инженерийн дэд бүтцийг үе шаттайгаар шийдвэрлэж, хөрөнгө оруулалт болон үйлдвэрлэл эрхлэх орчныг бүрдүүлэх чиглэлээр ажиллахаа мэдээллээ.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс