УИХ дахь ХҮН намын зөвлөлийн хурлаар эрчим хүчний салбарын өвөлжилтийн бэлтгэл ажлын талаар болон цаашид хэрэгжүүлэх бодлогын талаар танилцуулга сонсож хэлэлцлээ.

Эрчим хүчний сайд Б.Найдалаа "Эрчим хүчний салбар өвөлжилтийн бэлтгэл ажилд маш их анхааран өдөр шөнөгүй ажиллаж байна. Одоогийн байдлаар дулааны цахилгаан станцуудад 20 зуух засвар хийх ёстой байгаагаас ес нь бүрэн дуусчихсан. Үлдсэн 11 нь 35-85 хувийн гүйцэтгэлтэй байна. 12 турбогенератор засварласан байх ёстойгоос дөрөв нь 85 хувийн гүйцэтгэлтэй байгаа бол наймыг нь засаж дуусгасан.

Эрчим хүчний салбарын хувьд өвөлжилтийн бэлтгэл ажил дунджаар 79 хувийн гүйцэтгэлтэй байна. Ирэх өвөл цахилгаан хязгаарлах эсэхийг иргэд их асууж байна. Мэргэжилтнүүдийн тооцож байгаагаар эрчим хүчний хэрэглээ ирэх онд оргил ачаалал 1,956 МВт-д хүрэх тооцоо гарсан.

Харин суурьлагдсан хүчин чадал 1836 МВт байна. Энэхүү эрчим хүчийг бий болгохын тулд ДЦС-1410 МВт, салхинаас 30 МВт, уснаас 5 МВт, батерей хураагуураас 150МВт, үлдсэнийг нь урд, хойд хөршөөс импортоор хангана.

Энэ өвөл дулааны эрчим хүч дутагдана. Дулааны цахилгаан станцууд өнөөдөр байгаа хүчин чадлаасаа 50 хувиар илүү дулаан нийлүүлж, улайссан байдалтай, хэтрүүлэн ажиллаж байна. Улаанбаатар хот дулааны станцын дутагдалд орсон. Хорооллоор нь байтугай  хоёр гуравхан байшин барих боломжгүй нөхцөлтэй болсон учраас ирэх оны төсөвт Дулааны цахилгаан станц V барих төсөв тавьсан" гэж мэдээллээ.