Хүнс, хөдөө аж ахуй, хөнгөн үйлдвэрийн яам, Хөвсгөл аймгийн Хүнс, хөдөө аж ахуйн газар, Монголын арьс ширний үйлдвэрлэлийн холбоо болон үндэсний үйлдвэрлэгчид хамтран “Хүүхдийн гутал” компанит ажлыг Хөвсгөл аймагт энэ  сарын 16-18-ны өдөр зохион байгууллаа.

Хүүхэд өсвөр үеийнхний өдөр тутмын хэрэглээнд тохирсон, эрүүл ахуй, хөдөлгөөний онцлогт нийцсэн, чанар, аюулгүй байдлын шаардлага хангасан гутлын хэрэглээг нэмэгдүүлэх, гутлыг зөв сонгох талаарх мэдлэг, ойлголтыг нэмэгдүүлэх зорилготой аж. 

Компанит ажлын хүрээнд “Хүүхдийн гутал – Үндэсний үйлдвэрлэл” уулзалтыг зохион байгууллаа. Хүүхдийн гутлын хэрэгцээ, орон нутгийн эрэлт, үнийн хүртээмж, загвар, хэмжээ, захиалга, борлуулалт болон цаашдын хамтын ажиллагааны тухай санал солилцов. Хүүхдийн гутлын үйлдвэрлэл, нийлүүлэлтийг орон нутгийн хэрэгцээ, онцлогт нийцүүлэх боломжийн талаар хэлэлцжээ.

“Хүүхдийн гутал” компанит ажил нь зөвхөн бүтээгдэхүүнийг сурталчлахад чиглэхгүй бөгөөд хүүхдийн хөлний эрүүл мэнд, гутлын зөв сонголт, зохистой хэрэглээний талаарх мэдлэгийг нэмэгдүүлэх, үндэсний үйлдвэрлэлийг дэмжих хэрэглээний соёлыг төлөвшүүлэхэд чиглэж байна.

                                                     Үндэсний үйлдвэрлэгчдийн гутлын үзэсгэлэн худалдаа боллоо

Компанит ажлын хүрээнд “Хос-Аз” ХХК, “Хос Арт” ХХК, “Тайгын хийц” ХХК, “Лугати” ХХК, “Дархан минж” ХХК, “Дархан нэхий” ХК, “Хатан Ивээл Хайрхан” ХХК зэрэг үндэсний үйлдвэрлэгчид өдөр тутмын, өвлийн, хөдөлмөр хамгааллын, хүүхдийн гутлын үзэсгэлэн худалдааг зохион байгуулж, орон нутгийн хэрэглэгчдэд танилцуулан борлууллаа.

Орон нутгийн иргэд шууд үйлдвэрлэгчээс гутал худалдах, бүтээгдэхүүний хэмжээ, загвар, үнэ, чанар болон хэрэглээний талаарх мэдээллийг авах боломж бүрдсэн юм.

“Зөв гутал – Эрүүл хүүхэд – Зөв хөгжил” уриан дор зохион байгуулж буй “Хүүхдийн гутал” компанит ажил нь цаашид хүүхдийн гутлын зөв хэрэглээг төлөвшүүлэх, чанар, аюулгүй байдлын талаарх мэдлэгийг нэмэгдүүлэх, үндэсний үйлдвэрлэлийг дэмжих чиглэлээр үргэлжилнэ.

Эх сурвалж: Хүнс, хөдөө аж ахуй, хөнгөн үйлдвэрийн яам