Австралийн HYROX-ийн тамирчин Жоанна Вьетрик Бээжинд болсон тэмцээний үеэр өмдөндөө бие засан хувцсаа бүр цаашлаад тэмцээний зам талбайг бохирдуулсан ч уралдаанаа үргэлжлүүлсэндээ уучлалт хүсжээ.

Учир нь энэ үйлдэл олны нийтийн дургүйцлийг төрүүлээд байв. Тэрбээр уралдааны үеэр болсон явдлыг үл харгалзан тэмцээнээ үргэлжлүүлж, барианд орсон байна. Харин уг үйл явдлын бичлэг болон зураг цахим орчинд тарсны дараа олон нийтийн шүүмжлэлд өртжээ.
 
Вьетрик энэ талаар цахим хуудсандаа мэдэгдэл хийж, Хятадын ард түмэн, хамт уралдсан тамирчид, үзэгчид болон HYROX-ийн зохион байгуулагчдаас чин сэтгэлээсээ уучлалт хүссэн байна.
 
Тэрбээр “Одоо бодоход би замаас гарч, уралдаанаа зогсоох ёстой байсан. Би өөр сонголт хийх ёстой байснаа хүлээн зөвшөөрч байна” хэмээн бичжээ.

Мөн уралдаан эхлэх үед өөрийгөө эрүүл, бэлтгэлтэй байсан бөгөөд ийм зүйл болно гэж огт төсөөлөөгүй гэдгээ хэлсэн байна. “Миний үйлдэл зөвхөн надад хамаарахгүйгээр бусдад нөлөөлснийг ойлгож байна. Үүнд өртсөн хүн бүрээс чин сэтгэлээсээ уучлалт хүсэж байна” хэмээн тэрбээр мэдэгджээ.
 
Үүний зэрэгцээ Вьетрик Бээжингийн тэмцээнээс өөрийгөө татаж, уг тэмцээнээс авсан бүх онооноосоо татгалзахаар шийдсэн байна.
 
HYROX-ийн үүсгэн байгуулагч Мориц Фюрсте мөн уг үйл явдалд уучлалт хүсэж, зохион байгуулагчид тухайн үед шуурхай арга хэмжээ аваагүй нь алдаа болсныг мөн хүлээн зөвшөөрсөн байна.

Түүнээс гадна цаашид ийм нөхцөл үүссэн тохиолдолд тамирчныг тэмцээнээс гаргах боломжтой шинэ журам нэвтрүүлэхээ мэдэгджээ.
 
Эх сурвалж: BBC