Гачууртын уулзвараас Налайх, Чойрын уулзвар хүртэлх 20 километр авто замын дагуух явган зорчигчдын аюулгүй байдлыг хангах зорилгоор энэ онд гурван байршилд явган хүний гүүрэн гарц барьж байна гэж Нийслэлийн Замын хөгжлийн газрын Засвар, арчлалтын хяналтын хэлтсийн дарга О.Энхбаатар хэллээ.

Тэрбээр "Тус чиглэлийн зам ашиглалтад орсноос хойш иргэд зам хөндлөн гарах үедээ аюулгүй байдлаа хангах хүндрэлтэй байгаа талаар санал, гомдол ихээр ирүүлдэг байсан" гэсэн юм. 

Үүнтэй холбоотойгоор Налайхын зам дагуух таван суурьшлын бүсийн ойролцоо явган зорчигчдод зориулсан таван гэрлэн дохио байршуулсан. Харин энэ онд замын сангийн хөрөнгөөр нэмэлтээр гурван байршилд гүүрэн гарц барихаар төлөвлөж, гүйцэтгэгч компаниуд ажлаа эхлүүлээд байна.

Тодруулбал:

• Баянзүрх товчооны орчим явган зорчигчдын хөдөлгөөн ихтэй хэсэг
• 126 дугаар сургуулийн орчим хүүхдийн хөдөлгөөн ихтэй бүс
• “Эмийн ургамал” автобусны буудлын орчим шинээр суурьшлын бүс үүсэж буй хэсэг.

Гүүрэн гарцын барилга угсралтын ажлыг гэрээний дагуу 2026 оны арванхоёрдугаар сарын 31-ний дотор дуусгахаар ажиллаж байна. Шинээр барих гүүрэн гарцуудыг металл хийцтэйгээр төлөвлөсөн бөгөөд хоёр талдаа тэргэнцэртэй иргэд зорчих боломжтой налуу замтай байхаар зураг төсөлд тусгажээ.