Олон улсын Ардчиллын өдрийг тохиолдуулан Ардчиллын төлөөх намууд нэгдэн мэдээлж байна.

Тодруулбал мэдээллийг Ардчилсан хөдөлгөөний нам, Ардчилсан нам, Иргэний оролцооны нэгдэл нам, Монгол Консерватив нам, Монголын Уламжлалын нэгдсэн нам, Монголын хүний төлөө намын төлөөллүүд хамтран хийлээ. 

Тэд "НҮБ-ын Ерөнхий Ассамблейгаас 2007 онд жил бүрийн 9 дүгээр сарын 15-ныг Олон улсын Ардчиллын өдөр болгон зарлажээ. Үүнийг гишүүн орнуудад уриалж, иргэдийн оролцоог нэмэгдүүлэх, асуудалд нь анхаарлаа хандуулах, шударга сонгууль зохион байгуулахыг зөвлөжээ. 

Манайх 2019 онд олон нийтийг хамарсан ганц арга хэмжээ хийснээс хойш дорвитой үйл ажиллагаа зохион байгуулаагүй. Тиймээс бусад намууд нэгдэж, сонгуулийн бус жилүүдэд ардчиллыг хамгаалах чиглэлд хамт дуу хоолойгоо нэгтгэж, арга хэмжээ зохион байгуулахаар шийдвэрлэсэн. Монгол Улс бүс нутагтаа ардчиллын "баянбүрд" гэгддэг. Тиймээс нэг өдрийн арга хэмжээгээр хязгаарлагдах ёсгүй. 

Энэ жилийн олон улсын уриа нь Raising hand and Voices буюу хүн бүрийн оролцоо, дуу хоолойгоо хүргэе хэмээгээд ирэх Даваа гарагт Democracy Forum буюу Ардчиллын чуулганыг зохион байгуулна. Зөвхөн сонгууль дөхөхөөр ард иргэдийг идэвхжүүлдэг биш, сонгуулийн бус үед ч үзэл санаагаа ярьдаг, намынхаа давуу талыг сурталчилдаг, мөрийн хөтөлбөрөө хэлэлцдэг байхаар тус чуулганыг хийж байгаа ба энэ нь зөвхөн нэг намыг өмчлөл бус, бүгд нэгдэж хийж буй арга хэмжээ байх болно" гэлээ.