АҮЭБЯ-ны Төрийн нарийн бичгийн дарга Б.Дашпүрэв Япон улсын "Кисо Жибан" ХК, ЖАЙКА-гийн төлөөлөгчдийг хүлээн авч уулзжээ.

Уулзалтын үеэр төлөөлөгчид хиймэл дагуулын SAR технологийг (хиймэл дагуул дээр байрлуулсан идэвхтэй радарын тусламжтайгаар дэлхийн гадаргыг өндөр нарийвчлалтайгаар зураглах арга) ашиглан уул уурхайн хаягдлын далангийн ханын нуралт, хөрсний гулгалт, ус нэвчилт, бэлчээрийн гарц, газрын гадаргын хөдөлгөөн, хэв гажилт үүсэж байгааг тодорхойлох, урьдчилан мэдэх, хянах боломжтойг хэлэв. 

Японы хиймэл дагуулын тус технологийг Монголд нутагшуулж, хэрэглэхээр талууд харилцан санамж бичиг байгуулах талаар санал солилцов.

Энэхүү технологи нь Монголын уул уурхайн салбар төдийгүй нийгэм, байгаль орчин, эдийн засгийн салбарт үр ашигтай. Үүнд хоёр улсын хамтын ажиллагаа чухал болохыг "Кисо Жибан" ХК-ийн төлөөлөгчид онцолжээ.
   
Б.Дашпүрэв “Талууд ажлын хэсэг гарган нээлттэй ярилцаж, цар хүрээгээ тодорхой болгосны дараа бодит ажил болох талаар ярьж, төслийн санхүүжилтийн дүн тодорхой болсны дараа санамж бичиг байгуулах саналтай байна” хэмээлээ. 

ЖАЙКА-гийн төлөөлөгчдийн зүгээс хамтын ажиллагааны төслийг бодит ажил болгоход Монгол Улсын дэмжлэг хэрэгтэйг илэрхийлэв. 

Эх сурвалж: Аж үйлдвэр, эрдэс баялгийн яам