Монгол Улс, Оросын Холбооны Улсын бүс нутаг хоорондын эдийн засгийн хамтын ажиллагааг өргөжүүлэх, худалдаа, хөрөнгө оруулалт, тээвэр, логистик, хил орчмын хамтын ажиллагааны чиглэлээр харилцан ашигтай төсөл, хөтөлбөрийг хэрэгжүүлэх боломжийг нэмэгдүүлэх зорилготой “Монгол-Оросын бүс нутгийн хоёрдугаар чуулга уулзалт” 2026 оны 9 дүгээр сарын 14-15-ны өдрүүдэд Улаанбаатар хотноо зохион байгуулагдаж байна.

Чуулга уулзалтад Монгол, Оросын төрийн болон орон нутгийн байгууллага, худалдаа, аж үйлдвэрийн танхим, бизнесийн холбоо, аж ахуйн нэгжийн 400 гаруй төлөөлөгч оролцож байна. 

БҮС НУТГИЙН ХАМТЫН АЖИЛЛАГААГ ЭДИЙН ЗАСГИЙН БОДИТ БОЛОМЖТОЙ УЯЛДУУЛНА

Энэ удаагийн чуулга уулзалтын хүрээнд хоёр улсын бүс нутаг хоорондын хамтын ажиллагааны тэргүүлэх чиглэлүүдийг хэлэлцэх нэгдсэн болон салбар хуралдаан, бизнесийн уулзалт, хоёр талт уулзалт, үзэсгэлэн зэрэг арга хэмжээг зохион байгуулж байна.

Өнөөдөр:

• “Тээврийн холболт, хил орчмын хамтын ажиллагаа: Евразийн коридорыг хөгжүүлэхэд Монгол, Оросын бүс нутгийн гүйцэтгэх үүрэг” сэдэвт салбар хуралдаан;
• “Монгол, Оросын бүс нутгуудын спортын салбарын хамтын ажиллагаа” сэдэвт салбар хуралдаан;
• Монгол Улс болон Евразийн эдийн засгийн холбоо, түүний гишүүн орнууд хоорондын Худалдааны түр хэлэлцээрийн хүрээнд байгуулагдсан Хамтарсан хорооны анхдугаар хуралдаан;
• Бизнесийн төлөөллийг холбоо тогтоох уулзалт (B2B);
• Монгол, Оросын бүс нутгийн аж ахуйн нэгжүүдийн үзэсгэлэн;
• Монгол, Оросын бүс нутгийн төлөөлөгчдийн хоёр талт уулзалт, хэлэлцээ зэрэг арга хэмжээ зохион байгуулагдаж байна.

Мөн Монгол, Оросын хамтын ажиллагааны үндэсний бизнесийн зөвлөлүүдийн хамтарсан өргөтгөсөн хуралдаан, Монгол, Оросын Засгийн газар хоорондын комиссын Бүс нутаг, хил орчмын хамтын ажиллагаа, аялал жуулчлалыг хөгжүүлэх дэд комиссын 18 дугаар хуралдаан, чуулга уулзалтын нэгдсэн хуралдааныг зохион байгуулна.

Чуулга уулзалтын хүрээнд зохион байгуулж буй B2B уулзалт, бүс нутгийн төлөөлөгчдийн хоёр талт уулзалт, аж ахуйн нэгжүүдийн үзэсгэлэн нь Монгол, Оросын аж ахуйн нэгж, бизнесийн байгууллага болон орон нутгийн төлөөлөгчдийн шууд харилцааг өргөжүүлж, худалдаа, хөрөнгө оруулалт, хамтын ажиллагааны шинэ боломжийг тодорхойлоход чиглэж буй.

Түүнчлэн чуулга уулзалтаар тээвэр, хил орчмын хамтын ажиллагаа, спорт, аялал жуулчлал болон бүс нутгийн эдийн засгийн харилцааны бусад чиглэлээр санал солилцож, хоёр улсын бүс нутаг хоорондын хамтын ажиллагааг цаашид өргөжүүлэх асуудлыг хэлэлцэнэ.

Монгол, Оросын бүс нутгийн хоёрдугаар чуулга уулзалт есдүгээр сарын 15-ны өдөр хүртэл үргэлжилнэ.