Улсын дээд шүүхийн Захиргааны хэргийн танхимын нийт шүүгчийн 2026 оны 09 дүгээр сарын 10-ны өдрийн хуралдаанаар Аглаг бүтээлийн хийд буюу “Өлзий бадруулагч” сүм шашны байгууллага болон иргэн Л.Отгонбаатарын нэхэмжлэлтэй, Захиргааны хэргийн давж заалдах шатны шүүхийн магадлалтай хэргийг Захиргааны хэрэг шүүхэд хянан шийдвэрлэх тухай хуулийн 123 дугаар зүйлийн 123.2.2-т заасан (хэрэг хянан шийдвэрлэх ажиллагааны ноцтой зөрчил гаргасан нь шүүхийн шийдвэрт нөлөөлсөн эсэх) үндэслэлээр хяналтын шатны шүүх хуралдаанаар хэлэлцүүлэхээр шийдвэрлэв.

Анхан шатны шүүх “Өлзий бадруулагч” сүм шашны байгууллага болон иргэн Л.Отгонбаатарын нэхэмжлэлтэй” хэргийн нэхэмжлэлийн шаардлагын зарим хэсгийг хэрэгсэхгүй, зарим хэсгийг нь хүлээн авахаас татгалзаж шийдвэрлэсэн бол давж заалдах шатны шүүхээс хэргийг анхан шатны шүүхээр дахин хэлэлцүүлэхээр буцааж шийдвэрлэсэн.

Харин хяналтын шатны шүүх давж заалдах шатны шүүхээс хэргийг анхан шатны шүүхээр дахин хэлэлцүүлэхээр буцаасан нь үндэслэлтэй эсэхийг хянан хэлэлцэх юм.

Тодруулахад, Аглаг бүтээлийн хийдийг үүсгэн байгуулагч, санаачлагч, бурханч лам, соён гэгээрүүлэгч Г.Пүрэвбат 2024 оны дөрөвдүгээр сарын 10-нд таалал төгссөн. Түүнээс хойш Төв аймгийн Борнуур суманд байрлах Өлзий бадруулагч шашны байууллагын харьяа “Аглаг бүтээлийн хийд”-ийн өмч, эзэмшлийн асуудал хөндөгдөж, шүүхийн маргаан үүсжээ.

Хийдийг бурханч ламын үр хүүхдүүд өв залгамжлах хууль ёсны эрхтэй гэж үзэж байгаа бол түүний шавь, Өлзий бадруулагч хийдийн Удирдах зөвлөлийн тэргүүн Л.Отгонбаатар энэ хийд хувийн өмч байх ёсгүй хэмээн шүүхийн маргаан үүсгээд буй юм.