Монгол Улс, Өмнөговь аймаг, Даланзадгад сум - Орон нутгийн оюутнуудын боловсролын хүртээмжийг дэмжин, сургуулиа төгсөөд нутагтаа ажиллах боломжийг нэмэгдүүлэх зорилготой “Оюу толгой” компанийн “Говийн Оюу - Оюутны тэтгэлэг” хөтөлбөр 11 дэх жилдээ хэрэгжиж байна.  2026–2027 оны хичээлийн жилийн тэтгэлэгт хөтөлбөрт 17 төрлийн мэргэжлээр суралцаж буй 79 оюутан шалгарсан бөгөөд тэтгэлгийн эзэд 2026 оны 9 дүгээр сарын 9-ний өдөр батламжаа гардан авлаа. Тэдний дунд 2-5 хүртэл жил дараалан тэтгэлэгт хамрагдаж буй оюутнууд бий.  

Өнгөрсөн хугацаанд тэтгэлэгт хамрагдан төгссөн оюутнуудын 85 хувь нь сургуулиа төгсөөд Өмнөговь аймагтаа эзэмшсэн мэргэжлээрээ ажиллаж байна. Ингэснээр орон нутагт нэн шаардлагатай байгаа боловсон хүчин бэлтгэгдэж, боловсрол, эрүүл мэнд, нийгмийн үйлчилгээ болон бусад салбарын хөгжилд хувь нэмрээ оруулж байна. 

Энэ хичээлийн жилд уг боловсролын тэтгэлэгт хөтөлбөрт эмч мэргэжлээр 13, мэдээллийн системийн чиглэлээр 12, инженерийн чиглэлээр 10, эм зүйч 9, багш 7, аялал жуулчлалын менежмент болон уул уурхайн технологийн чиглэлээр тус бүр 5 оюутан, түүнчлэн сэтгэл зүй, нийгмийн ажил, соёл урлаг, байгаль орчин, хөдөө аж ахуй, дизайн, геодези, хоол зүй, архитектурын чиглэлээр суралцаж буй оюутнууд шалгарсан байна. 

2010 оноос хойш “Оюу толгой” компани  давхардсан тоогоор 1,454 оюутанд сургалтын төлбөрийн тэтгэлэг олгон,  тэднийг чадварлаг мэргэжилтэн, хариуцлагатай иргэн болгон төлөвшүүлэхэд бодит хувь нэмрээ оруулаад байна. 

“Говийн Оюу - Оюутны тэтгэлэг” хөтөлбөрийг “Оюу толгой” компанийн санхүүжилттэй “Говийн Оюу хөгжлийг дэмжих сан” хэрэгжүүлдэг бөгөөд тэтгэлэгт хамруулах мэргэжлийн чиглэлийг Өмнөговь аймгийн Засаг даргын Тамгын газраас санал болгож, орон нутагт шаардлагатай мэргэжлээр суралцаж буй оюутнуудын дунд сонгон шалгаруулалт явуулдаг. Тус тэтгэлэг хөтөлбөрт хэрхэн хамрагдах тухай мэдээлэл жил бүр https://goviinoyu.mn/ -д байршдаг.