Хэдхэн хоногийн өмнө Япон Улсын Ямагата мужийн бага, дунд, ахлах сургуульд хэрэглэж байсан сурагчийн 400 ширээ сандлыг нийслэлийн гурван сургууль, орон нутгийн нэг сургуульд бэлэглэсэн.

Тус мужийн төрийн болон хувийн хэвшлийн 130 гаруй төлөөлөл Монгол Улсад зочлон ирсэн. Тэд Ямагата мужаас хүүхдийн сурах орчныг сайжруулахад дахин ширээ сандал нийлүүлэх боломжтой гэдгээ илэрхийллээ. 

УИХ-ын гишүүн Ж.Галбадрах "Ямагата мужийн орлогч дарга Орихара тэргүүтэй төлөөлөгчдийн хамт Хан Уул дүүргийн ерөнхий боловсролын 7-р сургуульд зочилж, багш сурагчидтай уулзаж, сэтгэгдлийг нь сонсжээ. Уг сургуульд хандивласан 75 ширээ сандлыг лекцийн танхим болон нэг ангидаа байршуулжээ.

Багш, суралцагчидтай уулзах үеэр сурагчид “Энэ сандал төгсөх жилд минь ирж байгаад харамсаж байна. Нэг, хоёр жилийн өмнө ирсэн бол илүү бүтээлч байх байж” гэжээ. Харин өөр нэг сурагч “Японы ширээ авсаархан, цүнхээ өлгөдөг, ном дэвтрээ хийдэг шургуулгатай байгаа мөн сандал нь налууртай, ганц ганцаараа суудаг нь тун таатай байна” гэлээ.

Энэ талаар УИХ-ын гишүүн Ж.Галбадрах цахим хаягтаа нийтэлсэн бөгөөд тэрбээр үргэлжлүүлэн "Өнөөдөр монголын сургуулиудад хоёр гурвуулаа зэрэгцэж суудаг ширээ сандал дутагдалтай байна. Боловсролын салбарын үнэн төрх ийм л байна" хэмээн нийтэлжээ.