БНХАУ эдийн засгаа дэмжихийн тулд төрийн өмчит банк, даатгалын компаниудад 54 тэрбум ам.долларын хөрөнгө оруулалт хийнэ.

Хятад улс санхүүгийн системээ бэхжүүлж, эдийн засгийн өсөлтийн саарлыг даван туулах зорилгоор төрийн өмчит найман банк, даатгалын компаниудад хөрөнгө оруулалт хийхээр болжээ.

БНХАУ-ын Сангийн яамны удирдан хэрэгжүүлж буй энэхүү хөрөнгө оруулалтын хэмжээ нийт 360 тэрбум юань (ойролцоогоор 53.6 тэрбум ам.доллар) байна.

Уг санхүүжилт нь эдгээр байгууллагуудын:

• Тогтвортой үйл ажиллагаа явуулах чадварыг сайжруулах,
• Эрсдэлийг давах чадамжийг нэмэгдүүлэх,
• Бодит эдийн засагт үйлчилгээ үзүүлэх боломжийг өргөжүүлэхэд чиглэж байгаа аж.

Тус улс барууны орнуудтай үүсээд буй худалдааны зөрчил, Ираны дайны нөлөө, хүн амын хөгшрөлт зэрэг олон сорилттой нүүр тулж байна.

БНХАУ-ын дарга Ши Жиньпин санхүүгийн тогтвортой байдлыг үндэсний аюулгүй байдлын чухал хэсэг гэж үзсээр ирсэн.

Хятадын эдийн засгийн өсөлт дөрөвдүгээр сараас зургаадугаар сарын хооронд мэдэгдэхүйц буурчээ. 

Ираны дайнаас үүдэлтэй газрын тосны үнийн өсөлт эдийн засагт нь дарамт болсон гэж үзээд байна. 

Эх сурвалж: BBC