Дамбадаржаа, Сэлбэ дэд төвийн барилгажилт, шинэ хэрэглэгч нэмэгдэх дулааны хэрэгцээг хангах, 63 МВт хүчин чадалтай Дамбадаржаа дулааны станцын барилга угсралт 70 хувийн гүйцэтгэлтэй байна.

Төслийн дулаан хангамжийн инженер Г.Цэнд “Өнөөдрийн байдлаар гурван зуухны үндсэн барилга, тоног төхөөрөмж, металл хийц, нүүрсний агуулах, туузан дамжуулга, уутат шүүлтүүр, яндан, бусад туслах байгууламжийн угсралт үргэлжилж байна. Барилгын ерөнхий гүйцэтгэгч “Хятадын Хоёрдугаар металлурги групп корпорац” ХХК-ийн 150 инженер, техникийн ажилтан ажиллаж байна” гэв.

Дамбадаржаа дулааны станц бүрэн ашиглалтад орсноор Дамбадаржаа, Сэлбэ дэд төвийн 5000 орчим өрхийг найдвартай дулаанаар хангана. Мөн нийслэлийн дулаан хангамжийн хүчин чадлыг нэмэгдүүлж, өвлийн оргил ачааллын үед үүсдэг дулааны хэрэглээний хязгаарлалтыг бууруулахад чухал ач холбогдолтой. “Сэлбэ 20 минут хот” төслийн хүрээнд барьж буй 77 блок барилгын ажил дууссаны дараа шинэ хэрэглэгчийг дулаан хангамжийн системд холбох нөхцөл бүрдэнэ. 

Азийн хөгжлийн банк, нийслэлийн Засаг даргын Тамгын газар хамтран энэ төслийг хэрэгжүүлж байна.

НЗДТГ-ын Хэвлэл мэдээлэл, олон нийттэй харилцах хэлтэс