Цагдаагийн байгууллагад энэ оны наймдугаар сарын 29-ний өдөр “Валют солиулах гээд залилуулсан” гэх дуудлага, мэдээлэл бүртгэгджээ.

Гомдол, мэдээллийн дагуу шалгалтын ажиллагаа явуулахад иргэн “Л” юань солиулах зорилгоор Фэйсбүүкт нийтлэгдсэн зарын дагуу үл таних этгээдтэй холбогдсон байна. Улмаар гурван удаагийн гүйлгээгээр нийт 93.9 сая төгрөг шилжүүлж, залилуулсан болохыг тогтоожээ.

Цагдаагийн байгууллагаас тухайн мөнгө шилжүүлсэн дансанд барилт хийж, хэргийг үргэлжлүүлэн шалгаж байна.

Иймд иргэд цахим орчинд нийтлэгдсэн зарын дагуу үл таних этгээдтэй харилцахдаа тухайн мэдээлэл, дансны эзэмшигч болон гүйлгээний нөхцөлийг сайтар нягталж, залилангийн гэмт хэргийн хохирогч болохоос сэрэмжлэхийг цагдаагийн байгууллагаас анхаарууллаа.

Эх сурвалж: Цагдаагийн ерөнхий газар