АНУ-ын Ерөнхийлөгч Дональд Трамп ханхүү Харри болон түүний гэргий Меган Маркл нарыг АНУ-аас Их Британи руу буцсанд “Баяртай байна” гэж мэдэгдсэн ч шүүмжлээд амжжээ.

Тодруулбал тэрбээр өчигдөр буюу есдүгээр сарын 2-нд Цагаан ордонд сэтгүүлчдийн асуултад хариулахдаа Харри, Меган нарыг Их Британийн хааны гэр бүлд хандах хандлагыг нь шүүмжилсэн байна.

“Би үүнд баяртай байна. Гэхдээ би тэдний шүтэн бишрэгч биш” хэмээн Трамп хэлжээ.

Трамп ялангуяа Меган Марклын талаар шүүмжлэлтэй байр суурь илэрхийлж, түүнийг талийгаач хатан хаан II Элизабет болон одоогийн хаан III Чарльзад “Үл хүндэтгэсэн” гэж үзэж байна гэв. “Би түүний гаргасан үйлдэлд дургүй байсан. Түүнийг хатан хаан болон хаан Чарльзад үл хүндэтгэж хандсан гэж боддог. Би талийгаач II Элизабеттай маш сайн харилцаатай байсан, мөн III Чарльзыг олон жилийн турш мэддэг, тэр бол агуу хүн" хэмээжээ.

Түүнчлэн “Хэрэв би хааны гэр бүлийн оронд байсан бол тэднийг буцаан хүлээж авахгүй байсан” гэж Трамп мэдэгдсэн байна.

Харри, Меган яагаад Их Британи руу буцав?

Ханхүү Харри, Меган Маркл нар 2020 онд хааны гэр бүлийн ахлах гишүүний үүргээс татгалзаж, АНУ-ын Калифорни мужид суурьшсан. Харин тэд өнгөрсөн долоо хоногт хүүхдүүдийнхээ хамт Их Британид эргэн ирсэн юм. Гэр бүл Лондонгийн гадна хэсэгт удаан хугацаагаар амьдрахаар төлөвлөж байгаа бөгөөд хүүхдүүд нь Их Британид сургуульд орох төлөвтэй байна.

Гэхдээ Харри, Меган нар хааны гэр бүлийн албан ёсны үүрэгтээ эргэн орохгүй, хувийн амьдралаа үргэлжлүүлэхээр байгаа юм. Тэдний Их Британи руу буцсан шалтгааныг хүүхдүүдээ эх оронтой нь илүү ойр байлгах хүсэлтэй нь холбон тайлбарлаж байна.

Сонирхолтой нь, Трамп Харри, Меган нарыг өмнө нь ч шүүмжилж байсан. 2020 онд Меган АНУ-ын ерөнхийлөгчийн сонгуулийн үеэр Жо Байденыг дэмжихийг уриалсны дараа Трамп “Би түүнд тийм ч дуртай биш” хэмээн мэдэгдэж байжээ.

Эх сурвалж: Reuters