АНУ-ын Аризона муж дахь алдарт Гранд-Каньон үндэсний цэцэрлэгт хүрээлэнд хүчтэй аадар борооны улмаас гэнэтийн үер бууж, хоёр хүн амиа алдаж, 14 хүн сураггүй болоод байна. Аврагчид сураггүй болсон хүмүүсийг эрэн хайх ажиллагааг үргэлжлүүлж байгаа ч цаг агаарын нөхцөл байдал хүндрэл учруулж байна.

Үер наймдугаар сарын 29-нд Гранд-Каньон орчимд үүссэн ба тус бүсэд богино хугацаанд маш хүчтэй аадар бороо орсны улмаас усны түвшин хэдхэн минутын дотор огцом нэмэгдэж, үер зам, гүүр, жуулчны бааз болон бусад байгууламжийг сүйтгэжээ.

Аврах багийнхан 60 гаруй хүнийг нисдэг тэргээр аюулгүй газарт нүүлгэн шилжүүлсэн бөгөөд нийтдээ 80 орчим хүнийг аварсан байна. Үерийн улмаас их хэмжээний шавар, чулуу, хог хаягдал Колорадо мөрөн рүү урсаж, зарим газарт явган хүний гүүрнүүд бараг бүгд сүйджээ.

Амиа алдсан хүмүүсийн нэг нь Техас мужийн эмч Жон Жиүсти болохыг ар гэрийнхэн нь мэдээлсэн бол нөгөө хохирогч нь 46 настай эрэгтэй байсан ба түүний цогцсыг Колорадо мөрний ойролцоох Crystal Rapids орчмоос олжээ.

Аврагчид сураггүй болсон хүмүүсийг эрэн хайж байгаа ч Гранд-Каньонд дахин аадар бороо орж, шинэ үер буух эрсдэл өндөр хэвээр байгаа тул ажиллагаа хүндрэх төлөвтэй байна.

Эх сурвалж: CNN