Улаанбаатарын гудамжаар алхахад барилгаасаа илүү хаяг, реклам нь нүдэнд тусна.

Нэг байшингийн хананд олон өнгийн, олон хэмжээтэй хаяг давхарлаж, цонх, фасадаа хүртэл даржээ. Хэн нь илүү том, хэн нь илүү тод харагдах вэ гэсэн уралдаан шиг.

Уг нь хаяг гэдэг хэрэгтэй газраа олоход туслах зориулалттай. Харин өнөөдөр зарим хаяг хотын өнгө төрхийг улам замбараагүй болгож байна.

Шинэ байр, шинэ гудамж олноор нэмэгдэж байгаа ч хаягжилтын нэгдсэн стандарт, мэдээллийн уялдаа хангалтгүй хэвээр. Нэг гудамжинд ижил төстэй хаяг байхгүй, зарим барилга дээр хаяг нь харагдахгүй шахам байх тохиолдол ч бий.

Хотыг гоё болгоход заавал том бүтээн байгуулалт хэрэггүй. Заримдаа хэрэггүй нэг хаягаа буулгаж, байгаа хаягаа зөв байрлуулахад л эхлэл тавигдана. Дэлгүүрийнхээ нэрийг тодруулах гэж хотынхоо өнгийг дарахгүй байя.  

Хотыг барилга биш, эмх цэгц нь "хот" болгодог. Улаанбаатарын гудамж бүрт “хаана вэ?” гэсэн асуултын хариу тодорхой байж, хаяг бүр хотын өнгө төрхөд сэв биш, цэгц нэмдэг байгаасай.