Одоогийн байдлаар Балба-Төвөдийн үерийн улмаас 794 хүн амь насаа алдаж, 2500 гаруй хүн ор сураггүй алга болоод байна.

Харин уг үерийн үеэр Балбын нэгэн дүүргийн сургуулийн захирал 900 сурагчаа аюулаас аварчээ. Тодруулбал тэр үерийн нөхцөл байдлыг шуурхай ажиглан гамшгаас 10 минутын өмнө яаралтай арга хэмжээ авсан байна. 

Түүнийг Ражэндра Давади гэдэг бөгөөд Балбын Нувакот (Nuwakot) дүүрэгт байрлах Трибхуван Тришули дунд сургуульд захирлаар ажилладаг. 

Тэр шуурхай арга хэмжээ авч, сурагчдыг өндөрлөг газар луу явахыг зааварлаж, сургуулийн автобусаар тэднийг аюулын бүсээс гаргажээ.

Тэрээр "Тухайн үед үерийн талаарх мэдээг дөрвөн хүнээс ойр ойрхон сонссон. Мөн эцэг эхчүүд сургууль дээр ирж, “хүчтэй үер болох гэж байна, би хүүхдээ авч явахаар ирлээ” гэсээр байсан. Тэр үед л хурдан шийдвэр гаргаж, хүүхдүүдийг аюулаас аврах хэрэгтэйг ойлгосон.

Үер болоогүй байсан ч нэг л өдрийн хичээл хоцорно шүү дээ. Сурагчид эхэндээ нөхцөл байдлыг нухацтайгаар хүлээж авахгүй байсан. Бид арга хэмжээ авалгүй хэдхэн минут л хоцорсон бол хэн ч өнөөдөр энэ тухай ярих боломжгүй байлаа. Би өөрөөрөө бахархаж байна" гэв.

Тус сургуулийн сурагч Юүниша Аматяа “Тэр өдөр бид хичээлээ хийж байсан. Багш гэнэт сурагчдыг нэг газарт цуглуулсан. Бид юу болоод байгааг тухайн үед ойлгоогүй. Тав гаруй минутын дараа багш нар ирж үерийн талаар мэдээлсэн.

Зарим сурагчид гэр лүүгээ шууд харьсан. Харин зарим сурагчид бусад ангийн хүүхдүүдээ хүлээсэн. Ингэснээр бид цаг алдсан. Үер орж ирэхээс хэдхэн секундийн өмнө бид сургуулийн хойд замаар өндөрлөг газар луу гүйсэн.

Би гүйж чадахгүй болоход найзууд минь тусалсан. Нүдний минь өмнө сургуулийн эргэн тойрны бүх зүйлсийг үерийн ус аваад явчихсан ” гэв.

Мөн сургуулийн захирал Давади аюулын дохиог сайжруулсан байсан бол иргэдийн аюулгүй байдлыг хангах боломжтой байсныг хэлсэн юм.

Эх сурвалж: BBC