Иргэн Э.Б бусдын банк бус санхүүгийн байгууллагад бүртгүүлсэн мэдээллийг ашиглан 5 сая төгрөгийн зээл авсан. Үүнийгээ өөр аппликейшинд шилжүүлэн авч ашиглажээ. Мөн аавынхаа тэтгэврийн данснаас 8 сая төгрөгийн тэтгэврийн зээл гарган авч бусдын эд хөрөнгийг хүч хэрэглэхгүйгээр, нууцаар, хууль бусаар авч хулгайлсан гэмт хэрэгт холбогджээ.

Хохирогч С “Банк бус санхүүгийн байгууллагаас над руу яриад зээлээ төл гэхээр нь гайхсан. Үүнээс өмнө миний нэрээр 5 сая төгрөгийн зээл авсныг нь огт мэдээгүй. Энэ асуудал хоёр жил гаруй үргэлжилж байна. Зээлийн хүү нь өсөөд 10 гаруй сая төгрөг болсон. Үүнээс болж би муу зээлдэгчийн түүхтэй болсон” гэж мэдүүлсэн байна.

Аавынхаа иргэний үнэмлэхийг ашиглан тэтгэврийн зээлийн гэрээг онлайнаар байгуулан цахим мөнгөний машинаас 8 сая төгрөг гарган авсан.

Харин иргэн Э.Б “Банк бусын аппликейшнд С-ийн хувийн мэдээллийг бүртгүүлэхдээ өөртэй нь хамт байсан. Өөрөөс нь мэдээллийг нь асуусан. Харин дараа нь 5 сая төгрөгийн зээл авах үедээ өөрт нь хэлээгүй юм” гэжээ.

Мөн тэрбээр аавынхаа иргэний үнэмлэхийг ашиглан тэтгэврийн зээлийн гэрээг онлайнаар байгуулан цахим мөнгөний машинаас 8 сая төгрөг гарган авсан. Хохирогч "Нэхэмжлэх зүйлгүй, гомдол саналгүй" гэжээ. 

Иргэн Э.Б-ийн дээрх үйлдлүүдийг Эрүүгийн хуулийн тусгай ангийн 17.1 дүгээр зүйлийн 1 дэх хэсэгт заасан бусдын эд хөрөнгийг нууцаар, хууль бусаар авч хулгайлах гэмт хэрэг гэж шүүх дүгнэсэн. Улмаар түүнд 3 жилийн хугацаагаар амьдарч буй нутаг дэвсгэрээс гарахыг хориглож зорчих эрх хязгаарлах ял оноожээ.