Ховд аймгийн Жаргалант суманд галт зэвсэг ашиглан бусдын эрүүл мэндэд хохирол учруулсан гэмт хэрэг өчигдөр (2026.07.27) гарчээ.

Цагдаагийн байгууллагад хэргийн талаарх мэдээлэл өчигдөр 18:00 цагийн орчимд ирсэн байна. Дуудлагын дагуу шалгахад 29 настай эмэгтэйг 34 настай нөхөр нь галт зэвсэг ашиглан гэмтээсэн байж болзошгүй урьдчилсан нөхцөлийг тогтоожээ.  Гэмтсэн иргэн аймгийн Бүсийн оношилгоо, эмчилгээний төвд эмчлүүлж байгаа бол хэргийг Ховд аймгийн Цагдаагийн газарт мөрдөн шалгаж байна.

Монгол Улсын 21 насанд хүрсэн иргэн ан агнах, буудлагын спорт-сургалтаар хичээллэх, үзмэр, цуглуулгын зорилгоор галт зэвсэг өмчилж, эзэмшиж болно. Үүний тулд галт зэвсгээ бүртгүүлж, галт зэвсэг эзэмших, ашиглах, хадгалах аюулгүй ажиллагааны сургалтад хамрагдаж гэрчилгээ авах ёстой. Иргэн өөрийн өмчилж, эзэмшиж, ашиглаж байгаа галт зэвсгээ амь бие, эд хөрөнгийг араатан, амьтнаас хамгаалах зорилгоор ашиглаж болно.