Улаанбаатар хотын төвийн бүсийн цахилгаан хангамжийн найдвартай байдлыг нэмэгдүүлэх, 11 мянга гаруй хэрэглэгчийг тогтвортой эрчим хүчээр хангах зорилготой 17 сая еврогийн хөнгөлөлттэй зээлийн санхүүжилт бүхий төслийн болон зээлийн гэрээнд өнөөдөр гарын үсэг зурлаа.

"Төвийн бүсийн цахилгаан дамжуулах, түгээх сүлжээний үр ашгийг дээшлүүлэх төсөл"-ийн III үе шатны хүрээнд Сүхбаатар дүүргийн 1 дүгээр хороонд шинэ дэд станц болон хос кабель шугам барьж байгуулах, мөн Туул дэд станцыг өргөтгөн шинэчлэхээр төлөвлөжээ.

Төслийг Холбооны Бүгд Найрамдах Герман Улсын Сэргээн босголтын зээлийн банкны 17 сая еврогийн хөнгөлөлттэй зээлийн санхүүжилтээр хэрэгжүүлэх бөгөөд ашиглалтад орсноор Улаанбаатар хотын төвийн бүсийн цахилгаан түгээх сүлжээний хүчин чадал, найдвартай ажиллагаа сайжрах юм.

Мөн Сүхбаатар, Чингэлтэй, Баянгол, Хан-Уул, Баянзүрх дүүргийн 14 хорооны хэрэглэгчид, тэр дундаа Улсын нэгдүгээр төв эмнэлэг, Улсын хоёрдугаар төв эмнэлэг, Өргөө амаржих газар зэрэг нэн чухал байгууллагуудын цахилгаан хангамжийн тогтвортой байдал бэхжихээр байна.

Гарын үсэг зурах ёслолд Сангийн сайд З.Мэндсайхан, "Цахилгааны дамжуулах үндэсний сүлжээ" ТӨХК-ийн гүйцэтгэх захирал Б.Нямсамбуу, ХБНГУ-аас Монгол Улсад суугаа Онц бөгөөд Бүрэн эрхт Элчин сайд Хельмут Кулиц, ХБНГУ-ын Сэргээн босголтын зээлийн банкны төлөөлөгчид оролцов.

Ёслолын үеэр Сангийн сайд З.Мэндсайхан Монгол, Германы хөгжлийн хамтын ажиллагаа эрчим хүч, байгаль орчин, боловсрол, эрүүл мэнд зэрэг салбарт үр дүнтэй хэрэгжиж ирснийг онцолж, Германы Засгийн газар болон Сэргээн босголтын зээлийн банк Монгол Улсын эрчим хүчний салбарын шинэчлэлийг тууштай дэмжиж ирсэнд талархал илэрхийллээ.

Эх сурвалж: Сангийн яам