УИХ дахь Өргөдлийн байнгын хорооны хуралдаан болж байна. Хуралдаанаар:

• Ерөнхий боловсролын сургуулийн хоол үйлдвэрлэл, үйлчилгээний тухай хуулийн хэрэгжилтийн үр дагаварт хийсэн үнэлгээний тайлан
• Ерөнхий боловсролын сургуулийн хоол үйлдвэрлэл, үйлчилгээний тухай хуулийн биелэлтийг хангуулах хүрээнд суралцагчдад чанар, аюулгүй байдлын шаардлага хангасан шим тэжээллэг хоол хүнсээр үйлчлэх, хооллох зөв дадал төлөвшүүлэх, сургуулийн хоол үйлдвэрлэл, үйлчилгээнд эрүүл ахуйн нөхцөлийг бүрдүүлэх асуудлыг судлан санал, дүгнэлт гаргах, шаардлагатай бол шийдвэрийн төсөл боловсруулах үүрэг бүхий ажлын хэсгийн санал, дүгнэлтийг хэлэлцэж байна.

Боловсролын яамнаас Ерөнхий боловсролын сургуулийн хоол үйлдвэрлэл, үйлчилгээний тухай хуулийн хэрэгжилтийн үр дагаварт хийсэн үнэлгээний тайланг тус яамны Хоол үйлдвэрлэл, үйлчилгээний хэлтсийн дарга Т.Түмэнжаргал танилцууллаа.

Тэрбээр "2025-2026 оны хичээлийн жилд төрийн өмчийн 717 сургуулийн 1-12 дугаар ангид 740 орчим мянган хүүхэд сурч байна. Үүний 42 хувь нь буюу 340 гаруй мянган хүүхэд үдийн хоолны үйлчилгээнд хамрагдаж байгаа.

Төр өөрөө гал тогоогоо ажиллуулах үүрэгтэй. Түрээсийн гал тогоо ажиллуулахад хоол үйлдвэрлэл, тоног төхөөрөмж, хүний нөөцийн асуудал байна. Цаашид 6-12 дугаар ангийн хүүхдүүдэд үдийн хоол өгвөл гал тогоо, хүний нөөцийн асуудал тулгамдана.

Бага ангийн сурагчид эцэг эхээсээ өдөрт 2100 төгрөг, дунд ангийнхан 20 мянга хүртэлх төгрөг авч явж хоол худалдан авч иддэг

Сургуулийн хоол зүйчийн асуудал байна. Сургууль бүрд хоолзүйч ажиллана гэж хуульд заасан байгаа. Одоогоор 300 гаруй сургууль хоолзүйчтэй. Дараагийн нэг тулгамдаж буй асуудал нь хүнсний хангамж. Сургууль, цэцэрлэгийн хүүхдийн хоол, хүнсний хангамжид тусгайлсан бодлого, дэмжлэг хэрэгтэй байна.

Өнөөдрийн байдлаар хүнсийг зах худалдааны төвөөс шууд худалдан авч байна. Тэр дундаа орон нутагт сургууль, цэцэрлэгийн тендер оролцох ААН байдаггүй, тендерийн босгыг давдаггүй. Ингээд тендер амжилтгүй болоход хүнсийг зах, худалдааны төвөөс худалдан авч байна. Энэ нь хоол, хүнсний хордлого зэргээр аюулгүй байдлын эрсдэл учруулж байгаа.

Бид ахлах ангийн сурагчдыг оролцуулан судалгаа хийсэн. Энэ судалгаанд 600 гаруй сурагч оролцсон. Судалгаагаар бага ангийн сурагчид эцэг эхээсээ өдөрт 2100 төгрөг, дунд ангийнхан 20 мянга хүртэлх төгрөг авч явж хоол худалдан авч иддэг гэсэн. Гэтэл сургуулийн орчинд хүнсний эрүүл ахуйн шаардлага хангаагүй шарсан, хуурсан, чихэрлэг бүтээгдэхүүн худалдаалж байна. Хүүхдүүд эцэг эхээс авсан мөнгөөрөө үүнээс худалдан авалт хийж байгаа. Тиймээс дунд, ахлах ангийн сурагчдыг үдийн хоолонд хамруулах нь нэн чухал" гэв.