ОХУ Украины Киев хот руу "системтэй цохилт" хийхээр төлөвлөж байгаа хэмээн мэдэгдлээ. 

Ням гарагт ОХУ дайн эхэлснээс хойших хамгийн том агаарын довтолгоонуудын нэгийг Киевт хийсний дараахан уг мэдэгдлийг гаргаж байна. 

Шинэ цохилтоор Киев дахь "шийдвэр гаргах болон удирдлагын түвшний байгууламжууд" болон дроны үйлдвэрүүдийг онилно хэмээн онцолжээ. 

Иймд Москвагийн эрх баригчид Киев хотод буй гадаад иргэд, дипломатуудыг аль болох хурдан гарч явахыг зөвлөв. 

Украины талаас ОХУ-ын уг сүрдүүлгийг "ичгүүргүй сүрдүүлэг" хэмээгээд холбоотнуудаа Москвад үзүүлэх дарамт шахалтаа нэмэгдүүлэхийг уриалжээ. 

"Москва гадаадын иргэдэд анхааруулга өгсөн нь өөрсдийн довтолгоогоор дипломат төлөөлөгчдийг айлган сүрдүүлэх зорилготой гэдгээ хүлээн зөвшөөрч байна" гэж Украины мэдэгдэлд дурджээ.

Мөн дайн эхэлснээс хойш Оросын довтолгоо “долоо хоног ч зогсож байгаагүй” буюу тасралтгүй үргэлжилж буй бөгөөд аюулын түвшин өмнөх саруудтай адил хэвээр байгаа гэсэн байна.

Сүүлд хийсэн Оросын довтолгоогоор дөрвөн хүн амь үрэгдэж, 100 орчим хүн шархадсан гэдгийг Украины ерөнхийлөгч Володимир Зеленський хэлсэн. 

Үүний өмнө ОХУ-ын ерөнхийлөгч Владимир Путин Оросын мэдэлд буй Украины Луганск муж дахь оюутны дотуур байрны халдлагад Украиныг буруутгаж, хариу арга хэмжээ авахаа мэдэгдээд байсан юм. 

Уг довтолгоогоор 21 хүн амиа алдсан хэмээн Оросын эрх баригчид мэдээлсэн. 

Харин Украины талаас иргэний байгууламжийг бус тус бүсэд байрлаж байсан Оросын элит дроны цэргийн ангийг онилсон гэсэн тайлбар хийсэн юм.

Эх сурвалж: ВВС