Албан тушаалын, залилангийн, хуульч мэргэжлийн ажлаа хууль бусаар ашигласан. Нэмээд хүнийг амиа хорлох нөхцөлд хүргэсэн гэх хэд, хэдэн зүйл ангиар прокуророос яллах дүгнэлт үйлдсэн хэргийг шүүх өнгөрөгч баасан гарагт (2026.02.06) шийдвэрлэв.

Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхээс бэлтгэсэн “Шүүхийн шийдвэрийн тойм”-оос харахад шүүхээс прокурорын яллах дүгнэлтийг заримыг хэрэгсэхгүй болгож, заримыг хөнгөрүүлэн өөрчилж, нэг хүнийг бүрэн цагаатгажээ. Нэг хэрэгт нийтдээ долоон хүн холбогдсон. Эхнээс нь тайлбарлавал:

Хамгийн тодорхой шийдвэр нь Ш.Батхолбоогийнх байв. Прокурор түүнийг “худал мэдүүлэх” гэмт хэрэгт буруутган яллах дүгнэлт үйлдсэн. Гэвч шүүх гэмт хэргийн шинж тогтоогдоогүй гэж үзэн хэргийг хэрэгсэхгүй болгож, бүрэн цагаатгасан байна. Өөрөөр хэлбэл, түүнийг эрүүгийн хариуцлага хүлээлгэх хэмжээний үйлдэл хийгээгүй гэж шүүх дүгнэжээ.

Тэгвэл шүүхийн дүгнэлтээр Б.Мандахбаяр нь энэ хэрэгт хамгийн ноцтой оролцоотойд тооцогдов. Түүнийг албан тушаалын гэмт хэрэгт хатгагчаар оролцсон, залилах гэмт хэргийг их хэмжээний хохиролтой үйлдсэн, хүнийг амиа хорлох нөхцөл байдалд хүргэсэн, мөн хуульчийн мэргэжлийн үйл ажиллагааг хууль бусаар явуулахад хатгагчаар оролцсон гэж үзсэн байна. Эдгээрийг нэгтгэн түүнд нийт есөн жилийн хорих ял оногдуулж, нээлттэй хорих байгууллагад эдлүүлэхээр шийдвэрлэжээ.

Эндээс Б.Мандахбаяр хэн нэгнийг гэмт хэрэг үйлдүүлэх гэж хатгасан нь тодорхой болов. Тэр хүн Ц.Гантулга болох нь мөн шүүхийн тоймоос ойлгогдож байна. Учир нь Ц.Гантулгыг албан тушаалаа урвуулан ашиглах гэмт хэрэгт гүйцэтгэгчээр оролцсон гэж шүүх үзэж төрийн албанд томилогдох эрхийг дөрвөн жилээр хасаж, 15 сая төгрөгөөр торгожээ. Түүнээс гадна П.Энхтогтох ч мөн адил уг гэмт хэрэгт хамжигчаар оролцсон буруутайд тооцогдож ижил хугацаанд төрийн албанд томилогдох эрхээ хасуулж, 15 сая төгрөгийн торгууль авсан байна. Ингээд хатгасан, гүйцэтгэсэн гэх гурван хүн тодорхой болж байна.

Тэднээс гадна П.Одонтунгалаг, Б.Батсүх нар бол хуульчид. Тэднийг хуульчийн мэргэжлийн үйл ажиллагааг хууль бусаар явуулсан гэм буруутайд тооцсон. Улмаар П.Одонтунгалагийн хуульчийн эрхийг хоёр жилээр хасаж, 10 сая төгрөгөөр торгосон бол Б.Батсүх нэг жилийн хугацаанд эрхээ хасуулж, 5.4 сая төгрөгийн торгууль хүлээв.

Нэмээд Э.Амарбат гэж өөр нэг шүүгдэгч бий. Түүнийг Б.Мандахбаяраас хахууль авсан, Б.Мандахбаярыг түүнд хахууль өгсөн байж болзошгүй гэж прокурор яллах дүгнэлт үйлдсэнийг шүүх хэрэгсэхгүй болгосон. Шалтгаан нь, хахуулийн гэмт хэргийн шинж хангалттай тогтоогдоогүй. Ингээд түүнд холбогдох хахуулийн хэрэг хэрэгсэхгүй болсон ч албан тушаалын гэмт хэрэг үйлдсэн гэж шүүх үзэж, төрийн албанд томилогдох эрхийг дөрвөн жилээр хасаж, 27 сая төгрөгөөр торгожээ.

Ингэснээр нэг хэрэгт холбогдсон долоон хүний нэг нь бүрэн цагаатгагдаж, хоёрынх нь хахууль өгсөн, авсан гэх үйлдэл хэрэгсэхгүй болж, харин бусдынх нь албан тушаалын болон бусад гэмт хэрэгт эрүүгийн хариуцлага хүлээлгэлээ. Шүүх прокурорын яллах дүгнэлтийг бүхэлд нь хүлээн зөвшөөрөөгүй. Харин нотлох баримтад тулгуурлан хэсэгчлэн өөрчилж шийдвэрлэжээ.

Тэднийг Эрүүгийн хуулийн дараах зүйл ангиар шүүв. Үүнд: