УИХ-ын гишүүн Д.Ганмаа сэтгүүлчдэд мэдээлэл өглөө.

Өнөөдөр УИХ-ын Өргөдлийн байнгын хороо хуралдсан. Иргэн Б.Номин эмч, багш нарын цалинг нэмэх боломж бий, эсэхийг судлахыг хүссэн өргөдөл ирүүлжээ. Түүний өргөдлийг хэлэлцэх үеэр УИХ-ын гишүүн Д.Ганмаа Эрүүл мэндийн яам эмч, эмнэлгийн ажилтнуудын цалинг нэмэх байр сууриа Сангийн яам, ЭКХЯ-ны өмнө хамгаалах ёстой. Сангийн яам мөнгө байхгүй гэж байгаа бол хөрөнгө оруулалтуудаа яаж эрэмбэлэн сонгосноо тайлбарлахыг сайд нараас хүсжээ.

Гэтэл Эрүүл  мэндийн сайд Ж.Чинбүрэн түүний хажууд ирж, ""Хохь нь шүү, аятайхан байгаарай" гэхэд нь УИХ-ын гишүүн Г.Лувсанжамц ирж, "Та ингэж болохгүй, эмэгтэй хүнтэй ингэж харилцаж болохгүй" хэмээн сайдыг зогсоожээ. 

Д.Ганмаа гишүүн "Би зарчмын байр суурь илэрхийлсэн. Эх орондоо ирээд анх удаа ийм айдас түгшүүрт автаж байна. Одоо ч тайвширч чадаагүй байна. Г.Лувсанжамц гишүүн ирээгүй байсан бол юу болох байсныг мэдэхгүй" гэв.  Тэрээр "ЭМЯ эмч нарын цалинг нэмэхийн тулд ямар бодлого гаргаж, яаж орлогоо нэмэх вэ гэх мэт олон асуултыг би асуусан. Хэрэв эмч нар ажил хаявал хариуцлагыг төсвийн ерөнхийлөн захирагч буюу сайд хүлээх үү? Эсвэл эмч нар хүлээх юм уу? 

Төсвийн хөрөнгө оруулалт гээд гаднаас зээл аваад байшин бариад байгаа нь урсгал зардлыг улам л нэмнэ. Эмч нар ажлаас халшрах хам шинжтэй болсон. Тэдний ачааллыг хэрхэн бууруулах, гадагшаа эмчилгээ хийлгэхээр явж буй иргэдийн тоо зэргийг би шаардсан. Санал хураах явцад Ж.Чинбүрэн сайд миний хажууд ирсэн.

УИХ-ын гишүүний бүрэн эрхэд халдлаа. Эмэгтэй хүн учраас намайг дээрэлхсэн, заналхийлсэн үг хэллээ.Энэ талаар ярих уу, чимээгүй байх уу гэж их бодлоо.Гэхдээ манай салбарын нэр хүнд их унасан, чимээгүй байж болохгүй. Гэхдээ би УИХ-ын гишүүн, Засгийн газарт хяналт тавих үүрэгтэй. Энэ нь миний ажил тул зайлшгүй ярих ёстой гэж үзлээ. 

-Та Ж.Чинбүрэн сайдтай ямар харилцаатай вэ?
-Өмнө нь муудсан, сайдсан зүйл огт байхгүй. УИХ-ын гишүүн байхдаа эрүүл мэндийн салбарт гурван ажлын хэсэгт хамт ажилласан. Өөрөө миний ажлын хэсэгт гишүүн болж орсон. Өөрөө УИХ-ын гишүүн байхдаа энэ асуудлыг ярьсан атлаа яагаад ийм болов гээд хол суусан гишүүд над руу ирж, надаас асуусан.

Өмнөх сайдад ч би энэ шаардлагыг тавьж байсан. Үгүй бол Өргөдлийн байнгын хороо гэж байгаад яах юм. Ард түмний дуу хоолой бол гэж л жагсаалтаар биднийг УИХ-ын гишүүн болгосон. Бид ажлаа хийсний төлөө яагаад заналхийлүүлж байна вэ? 

Эрэгтэй хүн эмэгтэй хүний хувийн орон зайд халдлаа. Би олон газар ажиллаж амьдарсан. Анх удаа ийм зүйл харлаа. Яах ёстойг сайн мэдэхгүй байна. Түүний яриа микрофонд бичигдээгүй байх. Г.Лувсанжамц гишүүн шаардлага тавингуут гараад явсан. Өөрөө энэ салбарын хүн, зовлон жаргалыг нь мэддэг атлаа яагаад УИХ-ын гишүүний халдашгүй байдлыг үгүйсгэв? Миний үг хэлэх эрхэд халдах гэж оролдлоо.

Асуулт асуусны төлөө ингэж хандлаа. Маш том эрх ашгийн асуудал байгаа болоод ингэж улайрсан болов уу. Ийм учраас л шинэ гишүүдийг оруулж ирсэн болов уу" гэв.