Монголбанкны Мөнгөний бодлогын хороо ээлжит бусаар хуралдаж гаргасан шийдвэрээ өнөөдөр танилцуулав. 

Банкнаас иргэдэд шинээр олгох, нөхцөлийг нь өөрчлөх хэрэглээний зээлийн өр, орлогын харьцааг 45 хувь болгон шинэчлэх болжээ. Хэрэглээний зээлд тэтгэврийн зээл багтдаг.    

"Тэтгэврийн зээлийн хүү дунджаар жилийн 18 хувь буюу өндөр байна. Үүнд та бүхэн хяналт тавьдаг уу, ямар нэг арга хэмжээ авах уу? Учир нь энэ зээлийг банкны эдийн засагч судлах шаардлагагүй. Банкнаас цаг, зардал гаргах шаардлагагүй зээл" гэсэн сэтгүүлчийн асуултад Мөнгөний бодлогын хорооны хараат бус гишүүн, СЭЗИС-ийн багш Б.Мөнхзаяа хариулав. 

Тэрээр "Банкны бүтээгдэхүүний үнийг бид тогтоох боломжгүй, Монголбанк үүнд оролцдоггүй. Банкны эрсдэлийн шагнал, үйл ажиллагааны зардал, эх үүсвэрийн өртөг гэх мэтийг тооцоолон банкууд зээлийн хүүгээ тогтоодог. Тэтгэврийн зээлийг барьцаагүй олгодог тул өндөр эрсдэлтэй зээлд тооцогдож байна" гэв.
 
Улсын хэмжээнд 294 мянган ахмад тэтгэврийн зээлтэй. Тэд тэтгэврийн орлогынхоо 82.6 хувийг зээлийн төлбөрт суутгуулж, үлдсэн 17 хувийн орлогоороо эм тариа, ойр зуурын хэрэгцээгээ хангадаг байна.