Өнгөрсөн жилийн нэгдүгээр сард Баянзүрх дүүргийн 26 дугаар хороо, Дүнжингарав худалдааны төвийн урд зам хий тээвэрлэж явсан автомашин шатсаны улмаас дэлбэрэлт болсон. Уг дэлбэрэлтэд Дүнжингарав худалдааны төвийн урд байрлах 207 дугаар байр өртсөн билээ.

Өнөөдөр /2025.09.03/-нд тус барилгыг буулгах ажил эхэлснийг оршин суугч мэдээлэв.

Мэдээллийн дагуу биднийг очиход бэлтгэл ажил эхэлж байсан бөгөөд барилгыг тойруулан хашаалжээ. Харин тус барилгыг нураах ажил энэ тав дахь өдөр буюу /2025.09.05/-нд эхлэх бөгөөд энэ үеэр холбогдох мэргэжилтнүүд мэдээлэл өгөх боломжтой гэсэн тайлбарыг өгсөн юм.

Мөн энэ үеэр иргэн Б.С " Би дэлбэрэлтэд өртсөн барилгатай ойролцоо ажилладаг юм. Явган хүний зам бол хамгийн аюулгүй орчин байх ёстой. Гэтэл тус барилгыг нураах ажлын хүрээнд явган хүний замыг хэт нарийсгаж хашаалсан нь хамгийн их санаа зовоож байна.

Учир нь барилгын зэргэлдээ сургууль байдаг. Эд сургууль эхэлсэн үед  явган хүний замыг хааж, иргэд тэр дундаа хүүхдүүд авто замын дундуур алхахаас өөр аргагүйд хүрч байна.

Үүнийг яаралтай шийдэхгүй бол энэ орчинд осол гарахыг үгүйсгэхгүй. Эрсдэл өндөр байна. Иймд явган хүний замыг хааж байршуулсан зөрчлийг арилгаж, тээврийн хэрэгсэл, явган зорчигчдод саадгүй зорчих нөхцөлийг бүрдүүлж ажиллах хэрэгтэй ” гэв.

Гэрэл зургийг: Т.Бархас