XVII жарны “Сүрээр дарагч” хэмээх Гал морин жилийн эхний долоо хоног өндөрлөж байна. XVII жарны "Сүрээр дарагч" хэмээх гал морь жилийн хаврын тэргүүн сарын шинийн 1-ний өдөр хоёрдугаар сарын 18-нд тохиов.

Ирж буй жилийн ерөнхий өнгийг МБШ Төв-Гандантэгчэнлин хийдийн зурхайч лам Ч.Очирбат "Идэр, залууст амгалантай гэдэг нь хөдөлмөр эрхлэлт, идэвх санаачилга, амьдрал ахуйд ахиц гарах боломж илүүтэйг илтгэнэ. Харин нялхас буюу эгэл ардын амьдрал дунд зэрэг, ахмад настнууд биеэ энхрийлж, эрүүл мэнддээ анхаарах хэрэгтэй гэсэн утгатай" гэж тодорхойлов.

Ерөнхийлөгч, Ерөнхий сайд, УИХ-ын дарга нар ахмадуудад золголоо

Ерөнхийлөгч Ухнаагийн Хүрэлсүх XVII жарны “Сүрээр дарагч” хэмээх гал морин жилийн шинийн нэгний өглөө 08:15 цагт Төрийн есөн хөлт цагаан туганд хүндэтгэл үзүүлэв.

Ерөнхийлөгч У.Хүрэлсүх, Улсын Их Хурлын дарга Н.Учрал, Ерөнхий сайд Г.Занданшатар нар Шинийн нэгний өглөө ахмадуудад золгож, хүндэтгэл үзүүллээ. Дараа нь төрийн тэргүүнд Улсын Их Хурлын дарга Ням-Осорын Учрал, Монгол Улсын Ерөнхий сайд Гомбожавын Занданшатар нар алд цэнхэр хадаг дэлгэн амар мэндийг нь эрэн золголоо. Төрийн золголтын дараа Соёлын тэргүүний ажилтан, ерөөлч, магтаалч, морин хуурч Ц.Соёл-Эрдэнэ Төрийн хан хуурын хөгийг тэгшиллээ.

ТӨРИЙН ХАН ХУУРАНД:
“Зэ хө, төгөлдөр Монгол орныхоо төрийн магтаалыг аялгуулан айлтгая.
Эх орон, тусгаар тогтнолоо
Эрхэм төрөө, тамга, сүлдээ,
Алтан соёмбот далбаагаа
Агуу жавхлант Төрийн дууллаа
Эцэг тэнгэр, эх газартаа
Эзэн Чингис, хар сүлдэндээ
Есөн цагаан тугандаа сүслэн дээдэлж даатгая гэжээ.

Аравдугаар Богд Сар шинийн мэндчилгээ дэвшүүллээ

Аравдугаар Богд Жэвзүндамба хутагт монгол түмэндээ Сар шинийн мэндчилгээ дэвшүүлж, 
"Монгол ахан дүүс, багш, лам хувраг нараа
Өндөр Богдсын номын ёсоор сайн цаг ирж, 
Хурсан бид бүхний сүсэг хийгээд номын сахиусдын үйлсээр 
Хүссэн бүхэн сэтгэгчлэн бүтэж,
Өлзий хутаг орших болтугай.
Сар шинэдээ сайхан шинэлээрэй" гэв.

Ерөнхийлөгч У.Хүрэлсүх Эзэн Богд Чингис хааны шүтээнд хүндэтгэл үзүүлэв

XVII жарны “Сүрээр дарагч” хэмээх гал морин жилийн шинийн нэгний өглөө Монгол Улсын Ерөнхийлөгч У.Хүрэлсүх, Улсын Их Хурлын дарга Н.Учрал, Ерөнхий сайд Г.Занданшатар нар Эзэн Богд Чингис хааны шүтээнд хүндэтгэл үзүүллээ.

Ерөнхийлөгч У.Хүрэлсүхийн санаачилгаар Эзэн Богд Чингис хааны шүтээн, Их цагаан туг, Төрийн хасбуу тамгыг бүтээж, XVII жарны “Элдэв эрдэнэт” хэмээх могой жилийн хаврын тэргүүн сарын бэлгэт сайн өдөр “Чингис хаан” үндэсний музейд байх өргөөнд нь залсан юм.

Гадаадын банкуудыг Монголд ирж ажиллахыг урьж, яриа хэлцлүүд эхэллээ

Улсын Их Хурлын дарга Н.Учрал “Сүрээр дарагч” хэмээх гал улаан морин жилийн Сар шинийн мэндчилгээ дэвшүүллээ. Тэрбээр, 

Өнө эртнээс өртөөлөн уламжлагдсан Монголын цагаан сар бол тусгаар тогтнол, төрт ёс, эв нэгдэл, дэлхийд Монголоороо энх мөнх оршихуйн дархлаа болсон үндэсний өв, соёлын их баяр билээ. Аав ээж, ахмад буурлуудынхаа тохойг түшиж, ах захаа дээдлэн хүндэлж, ураг төрөл, ус нутаг, ахан дүүс, анд нөхдөөрөө уулзан золгодог, учрал баярын урин цагийн угтал билээ.

Уудам эх орныхоо баруунаас зүүн, өмнөөс умард, дөрвөн зүг найман зовхист түлш шатахуунгүйгээр цахилгаан машины түргэн цэнэглэх цэг бүхий их замын энх ногоон өртөөд байгуулна. Энэ бүхэн бол түлш шатахуунд төлдөг ам.доллар валютаа хэмнэх, эх нутаг, эрүүл мэндээ хамгаалах, энх оршихуйн ногоон үзэл санаанаас урган гарсан бодлого шийдэл, бодит ажил хэрэг юм гэв. 

Очирдара шүтээнд мандал өргөж, төр түмний буян заяаг даатгалаа

Төр, засгийн удирдлагууд шинийн нэгний өглөө өндөр гэгээн Занабазарын өөрийн мутраар урласан Очирдара шүтээн, Мэгжид Жанрайсиг бурханд мөргөж, мандал өргөдөг уламжлалтай.

Энэ ёсоор билгийн тооллын XVII жарны “Сүрээр дарагч” хэмээх гал улаан морин жилийн шинийн нэгний өглөө /2026.02.18/ Монгол Улсын Ерөнхийлөгчийн ахлах зөвлөх Н.Хүрэлбаатар, Улсын Их Хурлын Ерөнхий нарийн бичгийн дарга Л.Өлзийсайхан, Засгийн газрын Хэрэг эрхлэх газрын тэргүүн дэд дарга Ш.Раднаасэд нар Гандантэгчэнлин хийдэд морилж, Мэгжид Жанрайсиг бурханд мөргөн, төр, түмний заяа буяныг даатган Монголын төр, түмний эх шүтээн Очирдара бурханд мандал өргөлөө.  

М.Лхагвагэрэл: Аварга, арслан, заан ах, дүү нартайгаа барилдаж түрүүлсэндээ баяртай байна
XVII жарны “Сүрээр дарагч” хэмээх гал морин жилийн сар шинийн баярт зориулсан Улс, аймаг, цэрэг, сумын алдар цолтой 256 бөхийн барилдаанд Завхан аймгийн Яруу сумын харьяат, “Хилчин" спорт хороо, Хилийн цэргийн  0208-р анги, ”Завхан Даян” дэвжээний бөх, улсын заан Мөнхтөрийн Лхагвагэрэл түрүүлэв. 

Ховд аймгийн Буянт сумын харьяат, "Аврагч" спорт хороо, ”Ховд” дэвжээний бөх, улсын аварга Оргихын Хангай үзүүрлэлээ.

Улсын заан М.Лхагвагэрэл долоогийн зургаагийн даваанд Дархан аварга Н.Батсуурийг давж, үзүүр түрүүнд аварга О.Хангайтай үлдэж урамтай сайхан барилдан түрүүлсэн билээ. Тэрээр "Аварга, арслан, заан ах, дүү нартайгаа барилдаж түрүүлсэндээ баяртай байна" гэв. 

Элчин сайд нар ЦАГААН САРЫН МЭНДЧИЛГЭЭ дэвшүүллээ
Монгол Улсад ажиллаж, амьдарч байгаа Элчин сайд нарын Цагаан сарын баярын мэндчилгээг бид жил бүр хүргэдэг уламжлалтай. Тэдний "Сүрээр дарагч" гал морин жилийн мэндчилгээ ба энэ онд юу хийхээр төлөвлөж буй талаар нь хүргэж байна. Элчин сайд нарын мэндчилгээг тухайн улсын нэрийн цагаан толгойн үсгийн дарааллаар нийтлэв.

САНАЛ БОЛГОХ ЯРИЛЦЛАГА

2025 оны "Шилдэг өвлөн уламжлагч"-аар Ховд аймгийн Дуут сумын харьяат, Урианхайн алдарт Заны Жилкэрийн удмын 8 дахь үеийн урианхай туульч Нацагийн Дамдиндорж шалгарсан. Тэрээр 40 гаруй жилийн турш тууль, цуур, товшуур хөгжмийн язгуур уламжлалыг тээж, 750 гаруй шавь бэлтгэсэн бөгөөд түүний түүхийг хүргэж байна. 

-Би Ховд аймгийн Дуут сумын уугуул. Миний амьдрал Алтайн сүрлэг уулс, Дуут нуурын хөвөөнд, нүүдэлчин ахуй дунд өнгөрсөн. Бага наснаас минь л туулийн аялгуу чихэнд хоногшиж, сэтгэлд шингэсэн дээ. Энэ бол миний хувь тавилан, миний хийх ёстой ажил.

Аав минь өөрөө тууль хайлдаггүй байсан ч, туульчдын дунд өссөн хүн байсан болохоор үргэлж л туулийн баатруудын тухай ярьж өгдөг байлаа. Тэр яриа бүхэн зүрхэнд бахархал, хүсэл тэмүүлэл асаадаг байсан юм. Хоёр авга ах маань туульч байсан нь намайг энэ урлагт бүр ч гүн дурлахад нөлөөлсөн. 

Бага байхад авга ах нарынхаа туулийг сонсох дуртай байлаа. Тэдний ярьж өгдөг нүүдэлчин ардын бахархал болоод хэлсэн үг бүр нь миний сэтгэлд гүн шингэсэн. Тэдний хайлж буй тууль бол үгсийн цуглуулга биш, харин амьд түүх, амьд домог байсан. Би тэр түүхэнд умбаж, баатруудынхаа хамт морь унаж, дайсныг дарж, хайртай бүсгүйгээ авардаг байлаа. 

МОРЬ ЖИЛИЙН ӨНГӨ: Залууст амгалантай бөгөөд үр шим ихтэй жил байна

Ирж буй жилийн ерөнхий өнгө, байгаль цаг уур, хүн зоны амьдрал ахуй, засал номын талаар МБШ Төв-Гандантэгчэнлин хийдийн зурхайч лам Ч.Очирбаттай ярилцлаа.

-Гал морь жилийн ерөнхий өнгө болон шороон үхрийн зурлага хэрхэн дүрслэгдсэн бэ? 

-Жилийн өнгийг олон янзаар шинжилж, дүрсэлдэг. Үүний нэг нь шороон үхрийн шинж юм. Энэ жилийн хувьд шороон үхрийн шинжээр бол идэр, залууст амгалантай, нялхаст дунд зэрэг, хөгшдөд биеэ энхрийлүүштэй жил гарч байна.

Идэр, залууст амгалантай гэдэг нь хөдөлмөр эрхлэлт, идэвх санаачилга, амьдрал ахуйд ахиц гарах боломж илүүтэйг илтгэнэ. Харин нялхас буюу эгэл ардын амьдрал дунд зэрэг, ахмад настнууд биеэ энхрийлж, эрүүл мэнддээ анхаарах хэрэгтэй гэсэн утгатай.