МАН-ын Хяналтын ерөнхий хороо өчигдөр /2025.10.01/ хуралдаж, УИХ-ын гишүүн Б. Энхбаярыг намаас хөөх шийдвэр гаргажээ. Уг шийдвэртэй холбоотойгоор УИХ-ын гишүүн М.Бадамсүрэн, Д.Энхтүвшин, Л.Соронзонболд, Б.Заяабал, З.Мэндсайхан, Д.Бум-Очир, Б.Хэрлэн нарын гишүүд өнөөдөр мэдээлэл хийлээ.

Тэд УИХ-ын гишүүнийг намаас хөөсөн шийдвэрээ эргэн харахгүй бол МАН-ын бүлэг болон МАН-аас гарна гэж мэдэгдэв.  

УИХ-ын гишүүн М.Бадамсүрэн, МАН-ын Хяналтын ерөнхий хороо өчигдөр хуралдаж, УИХ-ын гишүүн Б.Энхбаярыг МАН-аас хөөх шийдвэр гаргасан гэх мэдээллийг хэвлэлээс авлаа.

МАН 2024 оны УИХ-ын сонгуульд оролцохдоо 5Ш хөтөлбөрийг хэрэгжүүлж, авлигатай тэмцэнэ гэж тунхагласнаас биш албан тушаалын төлөө арсалдан тэмцэлдэнэ гэж амлаагүй. Ард түмний амьдрал хүнд байна, цалин тэтгэвэр хүрэлцэхгүй байна гэж байхад эрх баригч нам албан тушаалын төлөө дүрэмгүй тоглолт хийж болохгүй.

Тиймээс Хяналтын ерөнхий хороо гаргасан шийдвэрээ эргэж харахгүй бол бид УИХ дахь МАН-ын бүлэг, цаашилбал МАН-аас гарах хүртэл шаардлага тавина гэж албан ёсоор мэдэгдэж байна. 

УИХ-ын гишүүн Д.Энхтүвшин, Хяналтын ерөнхий хороогоор хоёр асуудал хэлэлцсэн. Нэгдүгээрт, УИХ-ын гишүүн худал мэдээлэл тараасан гэх асуудал. Хоёрдугаарт, УИХ-ын дарга Д.Амарбаясгалантай холбоотой асуудал. Хоёр хүний асуудал яригдаж хууль хяналтын байгууллагаар гэм буруутай нь тогтоогдоогүй байхад гэм буруугийн асуудал нэг хүн дээр нь үйлчилсэнд харамсаж байна.

Энэ шийдвэрийг МАН-ын олон мянган гишүүдийн санал гэж бодохгүй байна. Энэ шийдвэрээ эргэн харахгүй бол МАН-аас гарах хүртэл арга хэмжээ авна.

УИХ-ын гишүүн Б.Хэрлэн, МАН-ын Хяналтын ерөнхий хороо өчигдөр 13 гишүүнтэй хуралдаж, нэг гишүүн татгалзаж, нэг гишүүн цагаан хуудас өгснөөр 11 хүний саналаар УИХ-ын гишүүн Б.Энхбаярыг намаас хөөх шийдвэр гаргасан байна. МАН-ын дүрэмд намын гишүүд улс орны болон дотоод асуудлуудын талаар мэдээлэл авах, өөрийн байр суурийг илэрхийлж, шүүмжлэх эрхтэй байдаг. Байр сууриа илэрхийлж, шударга бус байдлыг ил гаргаж тавьсан намын гишүүндээ хариуцлага тооцож, намаас хөөсөн нь гишүүний эвлэлдэн нэгдэх эрхийг зөрчиж байна.

Энэ бол МАН-ын 300 мянган гишүүний шийдвэр гэж харахгүй байна. МАН-ын дотоод ардчилал маш чухал. Шударга ёс, тэгш эрх, эв нэгдэл гэсэн намын дүрэмд заасан үндсэн зарчим байдаг. Энэ бол зөвхөн намын дотоод асуудал биш Монгол Улсын асуудал учир бид намын Хяналтын ерөнхий хорооны шийдвэрийг эсэргүүцэж энэ мэдэгдлийг хийж байна гэв.