Ерөнхийлөгч У.Хүрэлсүхийн урилгаар Япон Улсын Цог Жавхлант Эзэн Хаан Нарүхито, Эрхэм дээд Хатан Масако нар 2025 оны долоодугаар сарын 06-13-ны өдрүүдэд Монгол Улсад төрийн айлчлал хийж буй.

Тэднийг албан ёсоор угтан авах ёслол өнөөдөр /2025.07.08/ Д.Сүхбаатарын талбайд боллоо. Угтах ёслолд Монгол Улсын төр, засгийн төлөөлөгчид болон Эзэн Хааны одон хүртсэн монгол иргэд, Мэргэжлийн сүмо бөхийн Их аваргуудын төлөөлөл оролцлоо.

Үүний дараа Эзэн Хаан Нарүхито Төрийн ордны “Хүндэт зочны дэвтэр”-т гарын үсэг зурах бөгөөд Ерөнхийлөгч У.Хүрэлсүх, гэргий Л.Болорцэцэг, Эзэн Хаан Нарүхито, Эрхэм дээд Хатан Масако нар товч уулзалт хийх юм. 

Айлчлалын үеэр Эзэн Хаан Нарүхито, Эрхэм дээд Хатан Масако нар Үндэсний их баяр наадмын нээлтэд хүндэт зочноор оролцох бөгөөд “Чингис хаан” үндэсний музей, Гандантэгчэнлин хийд, Хустайн байгалийн цогцолборт газарт морилж, түүх, соёл, зан заншилтай танилцаж байна.

Энэ удаагийн айлчлал нь Эзэн хаан Нарүхитогийн хувьд Монголд хийж буй хоёр дахь айлчлал нь юм. Тэрбээр 18 жилийн өмнө хунтайж байх үедээ Монголд айлчилж байв. 

Эзэн хааны гадаад харилцааны гол үүрэг нь Япон Улсын бэлгэдлийн хувиар гадаад улс орнуудтай найрсаг харилцааг өргөжүүлэн хөгжүүлэх юм. Эзэн хааны айлчлалыг “бэлгэдлийн дипломат харилцаа” хэмээдэг. 

Гэрэл зургуудыг Г.Өнөболд