Үндэсний аудитын газраас 2026 онд “Улаанбаатар хотын дулаан хангамжийн бэлэн байдал, хэрэглэгчдийг дулаанаар хангах, түгээх үйл ажиллагаа”-нд гүйцэтгэлийн аудит хийх гэж байна. 

Аудитын зорилго нь Улаанбаатар хотын дулаан хангамжийн бэлэн байдал, хэрэглэгчдэд дулаан нийлүүлэх, түгээх үйл ажиллагааны хэрэгжилтэд үнэлэлт, дүгнэлт өгч, сайжруулах шаардлагатай асуудлаар санал, зөвлөмж боловсруулж, холбогдох байгууллагад хүргүүлэхэд чиглэнэ.

Иймд иргэд, олон нийт, аж ахуйн нэгж, байгууллагын оролцоог хангах, бодит нөхцөл байдал, тулгамдаж буй асуудлыг тодорхойлох зорилгоор нээлттэй санал, хүсэлт хүлээн авч эхэлжээ.

Улаанбаатар хотын дулаан хангамжийн бэлэн байдал, хэрэглэгчдийг дулаанаар хангах, түгээх үйл ажиллагааны талаарх санал, хүсэлт болон тулгамдаж буй асуудлаа tumurbaatart@audit.gov.mn цахим шуудангийн хаягаар ирүүлэхийг хүссэн байна.

Ирүүлсэн санал, хүсэлт, мэдээллийн эх сурвалжийн нууцлалыг чанд хадгалж, холбогдох хууль, журмын хүрээнд зөвхөн гүйцэтгэлийн аудитад ашиглах болно.

Эх сурвалж: Audit.mn