Өчигдөр Байгаль орчин, уур амьсгалын өөрчлөлтийн сайдын 2026 оны төсвийн танилцуулгыг хийлээ.

2026 онд Байгаль орчин, уур амьсгалын өөрчлөлтийн сайдын төсвийн дээд хязгаарыг 231.2 тэрбум төгрөг, үйл ажиллагааны урсгал зардлыг 198.2 тэрбум, хөрөнгө оруулалтын төсвийн төслийг 33 тэрбум төгрөг байхаар төлөвлөжээ. Энэ нь өмнөх оны төсвөөс 77.4 тэрбум, тодотгосон төсвөөс 29.7 тэрбум төгрөгөөр буурсан юм.

2026 онд 87 байгууллагын үйл ажиллагааны зардалд 120.1 тэрбум төгрөг зарцуулагдах аж. Үүнд:

• Яамны 111 ажилтны зардалд 7 тэрбум,
• Улсын тусгай хамгаалалттай 35 хамгаалалтын захиргааны 771 байгаль хамгаалагчид 30.1 тэрбум,
• Цаг уур, орчны шинжилгээний газруудын 1722 ажилтны үйл ажиллагаанд 69.7 тэрбум,
• Усны газар, гол мөрний сав газрын захиргааны 253 ажилтны үйл ажиллагаанд 10.378 тэрбум төгрөг тус тус багтжээ.

Мөн ойжуулалт, газрын доройтолтой тэмцэх, усны менежмент, тусгай хамгаалалттай газар нутгийг хамгаалах зэрэг зургаан хөтөлбөрийн зардалд 78 тэрбум төгрөг төсөвлөсөн байна. Үүний дотор:

• Ойжуулалтын хөтөлбөрт 67 тэрбум,
• Газрын доройтлыг бууруулахад 1.3 тэрбум,
• Усны менежментэд 2.4 тэрбум төгрөг тус тус зарцуулах юм.

Тус яам 2026 онд агаарын бохирдлыг бууруулах хөтөлбөрт 5 тэрбум төгрөг төсөвлөжээ.

Байгаль орчны яамны Төрийн нарийн бичгийн дарга Ц.Уртнасан хэлэхдээ, Агаарын бохирдлыг бууруулах чиглэлд үндэсний хороо байгуулж, БОУАӨЯ-ны сайд удирдаж байна. Энэ хүрээнд таван тэрбум төгрөг төсөвлөсөн. Гэвч тэрбумаар нь төсөвлөж удирдлагын бүтцийг өөрчиллөө ч бодит үр дүнд хүрэх хол. Бид илүү сайн менежмент хийж, хөрөнгө оруулалтаа нэмж, зохион байгуулалтаа сайжруулж байж энэ асуудлын ард гарна.

Ирэх онд нийслэл дэх түүхий нүүрс түлдэг хуучин зуухыг шинэ технологитой зуух руу солих ажил эрчимтэй үргэлжлэх ба цэргийн анги, төрийн байгууллагуудын зуухыг шинэчлэх төлөвлөгөөтэй байна гэв.

Мөн Усны газрын төсөв буурч, 3.2 тэрбум төгрөгөөс  300 сая болжээ.

Усны газрын дарга З.Батбаяр хэлэхдээ, манай байгууллага 2024 оны гүйцэтгэлээр 86 тэрбум төгрөгийн усны нөөц ашигласны төлбөр улсын төсөвт оруулсан. Энэ оны зургаадугаар сарын байдлаар 32 тэрбум төгрөг орууллаа. Бид ирэх оны менежментийн хөтөлбөртөө төлөвлөлт хийж 50 орчим тэрбумаар тооцож санал хүргүүлсэн.  Төсөвт төвлөрүүлсэн мөнгө, тогтвортой байдлаараа 3.2 тэрбум нь ядаж байх ёстой атал 10 дахин багасаж 300 сая болсонд харамсалтай байна.

3.2 тэрбумын 2 тэрбум нь Эгийн голын төсөлд хэрэгжүүлэхэд зарцуулах болсон. Ингээд 1.2 тэрбумын 800 саяар Говийн бүсэд дунд маштабын зураглал хийнэ. 300 гаруй сая төгрөгөөр 190 км урт голыг хамгаалах нь байтугай хамгаалах нэн шаардлагатай 10 том гол дээр ч очиж чадахгүй гэв.

Мөн хэлэлцүүлгээр Төсвийн тогтвортой байдлын зөвлөлийн гишүүн Л.Отгонтуяа, төсөв, хөтөлбөрийн үр дүнг холбож үнэлгээ хийж байж л бодит ахиц гарна. Урсгал зардал, хөрөнгө оруулалтыг салгаж, зөв зохицуулаагүйгээс үр дүн муу гарч байгааг анхаарууллаа.