Улаанбаатар хотын газар нутгийн 88.2 хувийг эзэлдэг гэр хорооллын бүсэд нийслэлийн хүн амын 60 орчим хувь амьдарч байна.

Энэ нөхцөл байдлыг өөрчлөх зорилгоор Баянхошуу, Сэлбэ, Ханын материал, Хүннү зэрэг байршилд цогц орон сууцны төслийг хэрэгжүүлэхээр болжээ.

Сонгинохайрхан дүүргийн 5 дугаар хороо, Ханын материалын 20.7 га талбайд 3,000 айлын орон сууц барих ажлыг 2025–2029 онд хоёр үе шаттай хэрэгжүүлэхээр төлөвлөсөн байна.

• Нэгдүгээр үе шат: 12.6 га талбайд 1,800 айлын орон сууц
• Хоёрдугаар үе шат: 8.1 га талбайд 1,200 айлын орон сууц

Нийт 232 нэгж талбарт газар чөлөөлж 92 хувийн гүйцэтгэлтэй үргэлжилж байна.

Төсөл хэрэгжсэнээр худалдаа, үйлчилгээ, спортын төв бүхий орон сууцны цогцолбор бий болж, гэр хорооллын яндан болон нүхэн жорлон тус бүр 3,000-аар буурах тооцоо гарчээ.

“Нийслэлийн орон сууцны корпораци” ХК нь холбогдох хууль, журмын дагуу төслийн гүйцэтгэгчийг сонгон шалгаруулах тендер зарласан аж. Санал хүлээн авах хугацаа наймдугаар сарын 7-нд дуусжээ. Тендерт гурван компани материал авсан ч өнөөдрийн байдлаар нэг л компани саналаа ирүүлсэн бөгөөд үнэлгээний хороо шалгаруулалтыг хийж байгаа гэв.