Энэ долоо хоногт УИХ-аар тамхины хяналтын тухай хуулийн нэмэлт, өөрчлөлтийн төслийг хэлэлцэн батална. Үүнтэй холбогдуулж эмч, багш нар, эцэг, эхчүүдийн төлөөлөл хэвлэлийн бага хурал хийлээ.

Судалгаагаар, 2023 оны тамхидалтын тархалтыг 2019 онтой харьцуулахад 10 хувиар нэмэгдсэн, эмэгтэйчүүдийн тамхидалт дөрөв дахин нэмэгджээ. Мөн тамхи татах нас гурван насаар залуужсан аж. 

Сүүлийн жилүүдэд манай улсад тамхи, ялангуяа шинэ төрлийн электрон болон халаадаг тамхины хэрэглээ өсч, импорт нэмэгдэн хяналтгүй зарагдах болсон.  Үүнтэй холбоотой өсвөр насныхны дунд электрон тамхины хэрэглээ уламжлалт тамхины хэрэглээнээс давж,  13-17 насны  дөрвөн сурагч тутмын нэг нь электрон тамхи татаж байна гэх судалгаа гарчээ.

БГД-ийн 40 дүгээр сургуулийн нийгмийн ажилтан хэлэхдээ, ахлах ангийн 200  гаруй сурагчаас судалгаа авахад электрон тамхины талаарх ойлголт дутмаг санхүү болоод эрүүл мэндэд үзүүлэх нөлөөллийн талаар мэдлэг хомс байсан. Хүүхдүүдээс электрон тамхи хурааж аван эцэг эхчүүдэд нь өгөхөд тамхи биш, хориглох заалт байхгүй гэх хандлагыг ч гаргаж байсан тохиолдол бий.  Тиймээс өсвөр насны хүүхдүүдийг тамхинаас гаргаж, хяналт тавихад зайлшгүй хуулийн зохицуулалт шаардлагатай гэв.

Нийслэлийн 39-р сургуулийн нийгмийн ажилтан, өсвөр үеийнхнээс гадна тавдугаар ангийн сурагч хүртэл ахаасаа авсан, ангийнхаа найзуудад сонирхуулна гэж электрон тамхи хэрэглэж байгаа тохиолдол гарсан. Урьдчилан сэргийлж мэдээлэл өгч байгаа ч хүүхдүүдийн үзэгний саванд баллуур, харандаа шиг хэрэгсэл болоод явж байна. Шаардлага тавья гэвч бидэнд хуулийн зохицуулалт алга.