УИХ-ын чуулганы Пүрэв гарагийн хуралдаан 10 цагт эхэлж УИХ дахь МАН-ын бүлэг хэлэлцэж буй асуудлуудад саналаа нэгтгэхээр үдээс өмнөх хуралдаанаас завсарлага авсан. Ингээд 14 цагт чуулганы хуралдаан эхэлсэн ч үдээс хойшхи хуралдаанаас завсарлага авах хүсэлтийг УИХ-ын гишүүн Ж.Алдаржавхлан гаргасан юм. Дэгийн хүрээнд бүтэн завсарлага авах боломжгүйг УИХ-ын дэд дарга мэдэгдэн, 1 цаг 30 минутын завсарлага олгосон юм. 

Гэвч 15:30 цагт эхлэх байсан хурал 16 цаг өнгөрч эхэлсэн. Хуралдааны ирцийн мэдээлэл 105 гишүүний бүртгэлтэй харагдах боловч танхимд цугласан нь гуравны нэгд дөхөх үү үгүй юу харагдав. Үүнийг ч баталж УИХ-ын дэд дарга Б.Пүрэвдорж хэлэлцэж буй асуудлын талаар санал хураахад ирц хүрэхгүй байгаа тул санал хураалтыг хойшлуулж байна хэмээн алх тогшсоноор өчигдрийн хуралдаан дууссан юм. 

Хуралдааны ирцийг харвал 19 гишүүн эмнэлгийн чөлөө, чөлөө, гадаад томилолттой байгаа бол 2 гишүүний ирц бүртгэгдээгүй буюу хуралдааныг тасалжээ. 

Эмнэлгийн чөлөөтэй:

1. С.Лүндэг, 
2. Г.Очирбат, 
3. Б.Тулга, 
4. Л.Гантөмөр 

Чөлөөтэй: 

1. Д.Амарбаясгалан, 
2. С.Амарсайхан, 
3. М.Нарантуяа-Нара, 
4. Н.Номтойбаяр, 
5. Х.Булгантуяа, 
6. Б.Уянга
7. Ж.Энхбаяр

Гадаад томилолттой

1. Ц.Мөнхбат, 
2. Л.Мөнхбаясгалан, 
3. Б.Түвшин, 
4. Ш.Бямбасүрэн 
5. А.Ундраа, 
6. С.Ганбаатар, 
7. О.Цогтгэрэл, 
8. Д.Энхтуяа

Тасалсан:

1. Х.Баттулга
2. Л.Оюун-Эрдэнэ нар байна. 

2026 оны төсөв батлах хугацаа хаяанд ирээд байна. Ирцээ харвал оролцоо хангалттай ч танхимд цуглаж, асуудал хэлэлцэж байгаа гишүүдийн тоо хангалтгүй байгааг өчигдрийн хуралдаанаас харж болохоор байна. 

Өнөөдрийн чуулганы хуралдаанаар дараах хоёр асуудлыг хэлэлцэх товтой. Үүнд, 

• Монгол Улсын 2026 оны төсвийн тухай, Үндэсний баялгийн сангийн 2026 оны төсвийн тухай, Нийгмийн даатгалын сангийн 2026 оны төсвийн тухай, Эрүүл мэндийн даатгалын сангийн 2026 оны төсвийн тухай хуулийн төслүүд /Засгийн газар 2025.09.01-ний өдөр өргөн мэдүүлсэн, гурав дахь хэлэлцүүлэг/
• Монгол Улсын 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төсөл /Засгийн газар 2025.09.01-ний өдөр өргөн мэдүүлсэн, хоёр дахь хэлэлцүүлэг/