Засгийн газраас “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” УИХ-ын тогтоолын төслийг 10-р сарын 30-ны өдөр өргөн мэдүүлсэн. Ерөнхий сайд Г.Занданшатар өнгөрсөн ням гарагт /2025.11.09/ танхимын гишүүдийн хамт Монгол Улсын ойрын таван жилийн хөгжлийн төлөвлөгөөг олон нийтэд танилцуулсан юм. Ерөнхий сайдын танилцуулгын дараа сайд нар сэтгүүлчдийн асуултад хариулав.

Гэр бүлийн хөгжлийг дэмжих чиглэлээр Засгийн газраас ирэх таван жилд ямар бодлого хэрэгжүүлэх талаар тодруулсан сэтгүүлчийн асуултад Гэр бүл, хөдөлмөр нийгмийн хамгааллын сайд Т.Аубакир хариулав. 



Тэрбээр, Гэр бүлийн хөгжилд төрөөс анхаарах зайлшгүй шаардлагатай. Сүүлийн 20 жилд дунджаар 70 мянга орчим байсан төрөлт одоо 50-60 мянга болсон. Төрөлт яагаад буурав, гэр бүлийн салалт яагаад ихсэв? гэх мэт олон шалтгааны суурь нь санхүүгийн асуудал болдог гэсэн статистик гарч байна. Тийм учраас Гэр бүлийн хөгжлийн тухай хуулийн төслийг боловсруулсан.

Олон улсын түвшинд гэр бүлийн хөгжлийг татварыг хөнгөлөлтөөр дэмждэг туршлага бий. Тиймээс манай яамнаас боловсруулсан төслөөс онцлох хэд хэдэн заалтыг хэлмээр байна. Үүнд, 

• 3 ба түүнээс дээш хүүхэдтэй гэр бүлийн гишүүдийн аль нэгийг ХАОАТ-аас чөлөөлнө. Эхнэр, нөхөр хоёр зэрэг хөдөлмөр эрхэлж байвал хөдөлмөрийн хөлс, түүнтэй адилтгах орлогыг ХАОАТ-өөс чөлөөлнө гэсэн үг.
• 4 ба түүнээс дээш хүүхэдтэй гэр бүл орон сууц худалдан авах бол ипотекийн зээлийн жагсаалтаас очерийг урагшлуулах.
• Эрүүл мэндийн багц даатгалын үйлчилгээ үзүүлнэ. Эрүүл мэндийн даатгалаа төлсөн бол түүгээрээ гэр бүлээрээ эрүүл мэндийн тусламж үйлчилгээ авч болно гэх мэт хөшүүргийг төсөлд тусгасан.

Гэр бүлийн хөгжлийн тухай хуулийн төслийг Засгийн газарт өнгөрсөн долоо хоногт танилцуулсан. Засгийн газар дэмжвэл УИХ-д өргөн мэдүүлнэ гэв.